أصبح الإنترنت لا غنى عنه فى كل بيت مصرى، ومع إيجابيته فهناك بعض السلبيات التى نتجت عنه ومنها الجرائم الإلكترونية، والتى فى بعض الأحيان يكون تأثيرها مدمرا، مثل قضايا التحرش الإلكترونى والابتزاز، والنصب، وهو ما دفع بمجموعة من الشباب من تأسيس جروب «مبروك أنت متحرش إلكترونى مشهور ونصاب دولى»، على مواقع التواصل الاجتماعى بهدف فضح من يقوم بتلك الجرائم، مع تقديم نصائح توعية للشباب والفتيات بكيفية التصرف إذا كانوا ضحايا لبعض المتخصصين فى تلك الجرائم.
عدد أعضاء الجروب 36 ألف شخص
شيماء يوسف، أحد مؤسسي الجروب الذى وصل عدد أعضائه إلى أكثر من 36 ألف شخص من النساء والرجال، قالت إن فكرة الجروب جاءت بسبب جهل الناس فى التعامل مع الإنترنت والتكنولوجيا بشكل عام، مما سهل وقوع الكثير من المواطنين ضحايا للنصب والتحرش والابتزاز الإلكترونى، «الغرض من فكرة الجروب، كانت فى البداية أن أى حد بيغلط في بنت او شاب أو بيسرقوا أكونتات، أننا نوقفه عند حده، وبيكون المطلوب أن الشخص ده يبعت لينا دليل إثبات أنه اتعرض لأى قضية من القضايا التلاتة، واحنا هنعمل كلنا ريبورت للصفحة الخاصة بالشخص اللى ارتكب الجريمة دى، لحد متتقفل، بس كله بدليل والبوستات بيتم مراجعتها الأول من خلال المسئولين عن الجروب، وفى النهاية أحنا هدفنا نساعد الناس مش أكتر».
يبلغ عدد المسئولين عن الجروب 9 أفراد يتناوبون على متابعته بشكل دورى، وقالت شيماء: «فى البداية الناس كانت فاكرة أن هدف الجروب هو مواجهة التحرش الإلكترونى بس، وده كان فى البداية خالص، لكن بعد كده طورنا الفكرة وبقينا نستقبل الشكاوى من كل الناس من غير التركيز على نوع معين، وفيه رجالة بتساعدنا كتير وبينشروا قصص عن التحرش أو النصب، يعنى مفيش تمييز من أى نوع».
جهل بالقوانين
الجهل بالقوانين التى تحمى من الجرائم الإلكترونية أو كيفية الإبلاغ عنها، كان أحد المشكلات التى رصدتها «شيماء» مع زملائها: «سبب انتشار الجرائم من النوع ده، هو أن الناس متعرفش أصلا مفهوم الجريمة الإلكترونية، ولا أيه هو، وبنوعى الناس طبعا، علشان يقدروا يحموا نفسهم، وبنصنع كل شوية فيديوهات أزاى يقدروا يتصرفوا فى حال تعرضوا لأى تهديد من أى نوع، ويارب الوعى ينتشر».
تعليقات الفيسبوك