خرج للتسوق ملتحفاً ببطانية.. ورواد السوشيال ميديا: شجاع أصل الدفا عفا
خرج للتسوق ملتحفاً ببطانية.. ورواد السوشيال ميديا: شجاع أصل الدفا عفا
انتشرت صورته على السوشيال ميديا «فيس بوك» بشكل كبير، وأثارت استغراب ودهشة المستخدمين، فهو لم يهتم بشكله الخارجي وهيبته أمام المارة، وكل ما شغل باله أن يحاول تدفئه نفسه، لذا قام بوضع بطانية ثقيلة على كتفيه لونها «بينك» والتحف بها، وخرج من منزله بتوقيت متأخر في ذروة الطقس القارس، واتجه إلى أحد المطاعم لشراء وجبة تساعده على توليد الحرارة بجسمه.
بهدا الشكل وقف الرجل يبحث عن وجبة له يأكلها في الليل متمتعا بجرأة شديدة، وهو ما جعل أحد الأشخاص يلتقط صوراً له وهو يقوم بشراء الطعام ويضع بطانية فوق كتفه، وكتب حمدي عثمان معلقاً على صورته: «هو مش غريب ولا حاجة الغريب أني كنت ماشي بنص كوم أول أمبارح والناس كانت واقفه تبصلي كأني واخد منهم دم»، كما علقت نهى جمال قائلة: «مش هينفعه بحاجة البرد لما ياكل في جسمه، هو كده مدفي وحلو قوي يا بخته عشان قدر يخرج بالمنظر ده في الشارع».
والتقطت هذه الصورة أمام أحد المطاعم بمحافظة الإسماعيلية، وعلقت إسراء فتوح: «المنظر ده بالنسبة لنا عادي جداً داخل شقتنا بنمشي كده»، كما قال إسلام جمعة: «والله ده رايق وزي الفل ده أنا ببقى نفسي أنزل من البيت أجيب حاجة أكلها وسقعان ومتلج ومش بقدر اتحرك نهائي من الساقعة ومستحيل أعمل كده ده راجل عنده شجاعة أنه ماشي بالبطانية مش المفروض نتريق عليه ده يعلمنا أن الدفا عفا بصحيح».
شيماء الخولي قالت: «هو مش غريب اللي عمله استنى علينا كلنا شوية كده وهنعمله زيه عشان البرد هياكل في جتتنا خلاص وينخر في عضمنا.. أنا عن نفسي لو أقدر أخرج بالشكل ده عشان الدفا هعمل ده المهم الدفا مش مهم الشكل خالص».
