قال الكابتن محمد عكر، مضيف طيران، إنه في أحد الأيام منذ نحو سنة تقريبا كان لديه رحلة من المدينة المنورة إلى القاهرة، «كان أغلب شغلنا في الوقت ده حج وعمرة قبل أزمة فيروس كورونا، وأثناء الرحلة لما كنت بستقبل الناس اللي طالعين على الطائرة عادتي إني بهزر مع الناس اللي طالعة وخصوصا لو كانت رحلات مصر وأعرف هما منين، ولما كنت بتكلم معاهم عرفت أن نحو 75% من الرحلة كلها من الشرقية، طبعا كنت مبسوط إن الناس دي كلها من محافظتي وكنت عاوز أعملهم حاجة في الرحلة».
كنت محتاج أعمل معاهم اللي فوق العادي
وأضاف عكر، خلال مداخلة عبر تطبيق «زووم»، مع الإعلامي محمد الشاذلي والإعلامية هدير أبو زيد، في برنامج «صباح الخير يا مصر»، المذاع على فضائي القناة الأولى، أن «بعد ما الطائرة قامت عرفتهم بنفسي وقولتلهم إني من الشرقية وقولتلهم أي حاجة تحت أمركم وكنت محتاج إني أعمل اللي فوق العادي معاهم، وبالفعل عزمت كل الطائرة مش الشراقوة بس، كان في ناس من الإسكندرية والقاهرة».
كنت بسمع الناس من آخر الطائرة بيدعولي
وتابع، أن «الرحلة كانت قوية جدا واتصورت مع الناس وأخدت أرقام ناس كتير جدا، العزومة كانت أي شخص بيطلب حاجة كان بياخدها هو والناس كلها، وبنسبة كبيرة الطائرة كلها أخدت كل حاجة هما احتاجوها، كمان في العادي أن أشيل الشنط للناس دي مش من مهام شغلي، لكن عملت ده وساعدت الناس وكنت بتعامل معاهم بطريقة كويسة جدا لأن هما دايما وخصوصا كبار السن بيبقوا داخلين وفاكرين إن الناس اللي لابسة بدل دول هيتعاملوا معاهم بطريقة مش كويسة، لكن لما شافوا إني بهزر معاهم بدأنا نتصور ونهزر وكانوا مبسوطين للغاية، ومن آخر الطائرة كنت بسمع الناس بتدعيلي».
تعليقات الفيسبوك