طفلة متعددة المواهب
طفلة تسبق سنها، وهبها الله مهارات كثيرة، رسم وكروشيه وأعمال هاند ميد، بخلاف اتقان لغة الإشارة لمساعدة الصم والبكم، وإجادة عدة لغات من بينها اللغة الإنجليزية.
فرح هاني، تبلغ من العمر 10 سنوات تعلمت لغة الإشارة في محاولة منها لمساعدة الصم والبكم، تحكي والدتها عن بداية شغف ابنتها بتعلم لغة الإشارة: «من وهي صغيرة لاحظت أنها ذكية ونبيهة وبتتعلم بسرعة، بتحب ترسم وبتحب تتعلم اللغات خاصة الإنجليزية، ولأننا عائلة كلنا بنحب الرسم وشغل الهاند ميد طلعت فرح زينا».
جدة فرح هي مثلها الأعلى في الحياة: «والدتي هي اللي علمت بنتي فرح الكروشيه ودايما بتشجعها وعلاقتهم ببعض مميزة جدا خاصة أنها أول حفيدة لها».. تتحدث الأم عن موهبة ابنتها التي ورثتها عن جدتها ووالدة جدتها: «فرح ورثت عن والدة والدتي أمينة العمروسي موهبة صنع العرائس لأنها كانت فنانة بتعمل عرايس قماش وبتوزعها على الأطفال ببلاش لإدخال السرور عليهم، والحمد لله لقينا فرح قادرة أنها تعمل عرايس مجسمة 4D بالكروشيه، وبقى لها صفحة على الفيس بوك اسمها (فوشيه) بتعرض عليها شغلها اللي باعت منه بالفعل».
تسير «فرح» على نهج والدتها: «فرح أخدت مني حاجات كتير زي شغل الهاند ميد، وكمان اتأثرت بأنشطة خيرية كنت بعملها وهي تعليم شغل الهاند ميد مستخدمة خامة الجلود للصم والبكم رغبة مني إني أساعدهم يتعلموا حاجة تنفعهم ويشتغلوا فيها».
أحبت «فرح» أيضا لغة الإشارة وتساعد الصم وضعاف السمع: «علمتها أساسيات لغة الإشارة وهي اجتهدت وبقت تشوف فيديوهات على يوتيوب لواحدة اسمها أمل صقر بتعلم لغة الإشارة».
قررت تقديم عدة أغاني وطنية وأغاني مبهجة كلها تفاؤل بلغة الإشارة: «عملت أول فيديو لها كان لأغنية اسمها (هنا صدقت حلمي) على صوت المغنية هلا رشدي اللي نفسها يوصل لها الفيديو ده، قدمت فرح الأغنية بلغة الإشارة وانتشر الفيديو بصورة كبيرة وعجب ناس كتير جدا وبتجهز أغاني تانية كلها فيها طلقة أمل وتفاؤل».
ولأن «فرح» ذكية وشخصية مؤثرة قررت والدتها أن تفتح لها قناة على موقع يوتيوب تخدم هدفها النبيل: «فرح نفسها تعلم الصم الكروشيه عشان كده هفتح لها قناة على يوتيوب عشان تعلم الأطفال في سنها وتعلم الصم وضعاف السمع الكروشيه واللي مشجعني انها محبوبة من الجميع وعندها قبول وخفة دم وسرعة نبيهة».
تعليقات الفيسبوك