«عيونه بتفضحه».. استشاري نفسي يكشف كيفية معرفة الشخص المتحرش

07:15 م | الثلاثاء 09 مارس 2021

ضجة كبيرة على مواقع التواصل الاجتماعي والرأي العام، بعد تحرش رجل بطفلة في المعادي، وهي الجريمة التي وثقتها كاميرات المراقبة، حتى تم القبض عليه.

ولعل الأمر الذي أثار استغراب الكثيرين، أنه شخص متزوج ولديه أطفال، وكان سلوكه العام أمام الجميع بأنه إنسان خلوق ولم يتوقع المحيطون به أنه «متحرش» ومن هذا المنطلق يتساءل عدد كبير عن كيفية اكتشاف المتحرشين وخاصة المحيطين بهم بشكل دائم لاسيما وأنهم قد يتظاهرون بالمثالية؟

الدكتور محمد هاني، استشاري الطب النفسي، يقول لـ«الوطن»، أن الشخص المتحرش يحاول أن يُظهر نفسه بأفضل السلوكيات، ولديه نسبة ذكاء عالية في إخفاء ما يفعله: «بيبقى مش معترف بالجانب الشاذ اللي موجود عنده أو مش مدركه وبيكلم في حاجات غير اللي بيعملها وبيحاول يخفي ده زي الحرامي الشيك اللي بيخبي لحد ما تكتشفي بعدين أنه بيسرق».

وأشار هاني، إلى أن الشخص المتحرش يحاول الهرب من التواجد في التجمعاات: «زي المتحرش بطفلة المعادي لو دخلت على صفحته هاتلاقي كان ليه أصحاب عادي وكانت الناس بتحترمه لكن بيعمل حاجات خارجة عن الطبيعة».

كيفية اكتشاف أو معرفة الشخص المتحرش

وعن كيفية اكتشاف الشخص المتحرش، أوضح استشاري الطب النفسي أنه يظهر من نظرة العين: «أول حاجة نظراته مش مريحة، وخاصة لو فيه جنس آخر، وبيلفت عينه أماكن معينة، وممكن يتعرف لو في بنت صغيرة مثلا، فممكن على أساس إن هو راجل كبير فيهزر معاها، فبيبان برده من طريقة الهزار بتبقى مش طبيعية، وبيقعد يفكر ويخطط طبعا عشان بيعمل الموضوع ده في السر ومش عايز يتفضح فبيختار الفريسة بتاعته».

واستكمل هاني حديثه عن كيفية اكتشاف الشخص المتحرش بقوله: «نظرات عينه وخاصة لو الحاجة اللي بتثيره في نفس المكان، تحس بارتباك ونظرات شهوانية مليئة بالرغبات.. أي متحرش بيبان من نظرة العين، رغم إنه بيتظاهر بالمثالية وتلاقيه بيعمل الجريمة وهو لابس بدلة».

وبالنسبة لقصة متحرش المعادي، فذكر هاني في تحليله النفسي للجريمة: «هو يمكن مكنش نازل يعمل الجريمة وهو ماشي ظهرت قدامه البنت فبدأ العقل الباطن بتاع الشذوذ اللي عنده يشتغل فنبهه إن ممكن يدخلها المدخل وبعدين تم اكتشاف الموضوع».