لبنى ونس تتوعد محمد رمضان بعد إصابة ابنها بحروق خطيرة: مش هسيب حقه
الفنانة لبنى ونس
وجهت الفنانة لبنى ونس انتقادات لاذعة للفنان محمد رمضان، إثر إصابة نجلها الفنان الشاب يوسف عمر بحروق خطيرة خلال الساعات الماضية، بعد انفجار قنبلة أثناء تصوير إعلان يشارك فيه «رمضان»، معبرة عن استيائها الشديد لمّا حدث لابنها الذي كاد يفقد حياته حسب وصفها.
استخدام قنبلة حقيقية خلال تصوير الإعلان
وكتبت الفنانة لبنى ونس، عبر حسابها على موقع التواصل الاجتماعي «فيس بوك»، قائلة: «إذا عملنا كل حاجة طبيعية وحقيقية كنا هَلَكنا، ولا تُلقوا بأيديكم إلى التهلُكة، يعني إذا فيه مشهد يا أستاذ محمد التمساح بياكلك نترحم عليك ويبقى آخر مشهد في حياتك».
وتابعت: «تعلمنا مهنة التمثيل على يد عظماء التمثيل، ولم يُطلق عليهم هذه الكلمة المزعومة، النجم والنجمة في مهنتنا يا أستاذ محمد رمضان، وإنت وأنا وكلنا عارفين إن ما يسمى بالنجم استغفر الله العظيم بيتعاملوا معاه في اللوكيشن كأنه إله هو المِحور والكل يدور حوله، هل ممكن تتعرض لما حدث لابنى في التصوير معاك، مستحيل طبعًا بتعمل أكشن وبتبقى عارف قبلها كل تفاصيله مرة واتنين وعشرة، واللي عاجبك بتوافق عليه واللي مش عاجبك بتغيره على هواك، ماحدش بيفرض عليك حاجة».
لبنى ونس تنتقد استخدام قنابل حقيقية أثناء التصوير
واستطردت لبنى ونس «يعني القنبلة اللي زرعها عصام الوريث لابنى تحت منه ومن غير ما يقوله ولا حتى يلبسه واقى يقدر يعمل معاك كده.. ليه؟!، إنت بني آدم وابني مش بني آدم؟.. إنت أغلى الناس عند والدتك ويوسف نن عيني ومفيش أغلى من الضنا، حط ابنك مكان يوسف هاتقول برضه كله في حبكم يهون».
الفنانة تهاجم المسؤول عن استخدام القنابل
واختتمت الفنانة لبنى ونس كلامها بقولها «بس أرجع وأقولك ابني ربنا هايجيب له حقه من اللي اسمه عصام الوريث ده اللي ميعرفش أبجديات عمله، اللي بيستبيح حياة الشباب عشان يحقق الطبيعية المزعومة الغلط اللي حضرتك بتتكلم عنها، حق ابني إن شاء الله هايرجع له مش هاسيبه عشان يبطل سي الوريث ده أنه يستهين بحياة الناس، سؤال بقى لما نموت سيادة النجم هايندفن فين؟ الديان والعدل والحق موجود واعتمدنا عليك يارب».
وكان الفنان محمد رمضان، أعلن عبر حسابه بـ«إنستجرام» عن إصابته بحروق في ظهره خلال التصوير، مؤكدًا أن كل ذلك يهون في سبيل ما يقدمه.
يوسف عمر يتقدم بشكوى للنقابة بعد إصابته بحروق من الدرجة الأولى
وفي تصريحات للفنان الشاب يوسف عمر، نجل الفنانة لبنى ونس، قال لـ«الوطن» إنه كان يصور إعلانًا بصحبة محمد رمضان الذي يتضمن مشاهد أكشن داخل منطقة طرة، وحدث انفجار للقنابل والديناميت التي كانت موجودة بـ«لوكيشن» التصوير والذي أسفر عن إصابته بحروق خطيرة بجسده من الدرجة الأولى، مشيرًا إلى تقدمه بشكوى إلى نقيب المهن التمثيلية الدكتور أشرف زكي «إزاي مفيش حماية؟ وإزاي يستخدموا قنابل حقيقية؟».