يوسف عمر بعد إصابته في إعلان محمد رمضان: «قالي عاش يا بطل»
يوسف عمر بعد إصابته في إعلان محمد رمضان: «قالي عاش يا بطل»
كشف الفنان يوسف عمر، الذي أصيب في إعلان مع الفنان محمد رمضان، تفاصيل الواقعة، حيث ذكر أنه كان يُصور إعلان مع رمضان، «أول ما قالوا أكشن، مشوفتش حاجة ومعرفش إيه اللي حصل، لقيت قنبلة اتفجرت، لغاية دلوقتي عندي مشكلة في وداني بسبب الصوت، وكمان محستش برجلي، لولا ستر ربنا كان ممكن أموت في لحظة».
وأضاف «عمر»، خلال مداخلة هاتفية في برنامج «الحكاية»، مع الإعلامي عمرو أديب، على شاشة «MBC مصر»، «الواحد لو صحته مش كويسة كنت مت، أنا والله بعد التصوير والواقعة دي كنت همشي عادي، بس اللي ضايقني أن عصام الوريث ده اتعامل معايا بعد الواقعة باستهتار كبير جدًا، وكان محسسني أني أنا اللي غلطان».
وأشار الذي أصيب في إعلان مع الفنان محمد رمضان، إلى أنه قام بتجسيد مثل هذه المواقف كثيرًا ، لكنه لم يتعرض مطلقًا للخطر، «المفروض المسدسات والقنابل في المشاهد متبقاش حقيقية، لازم يكون فيه أمان، قولت أكيد عاملين حسابهم من ناحية القنابل دي، أنا شغال حاليا في مسلسل ليسرا، وبشتغل في إعلانات».
وأوضح أن الفنان محمد رمضان، جاء له بعد انتهاء المشهد، وقال له « شوت حلو جدا، عاش يا بطل، مكنش وقتها شاف رجلي، والكلام ده قاله قبل أنا نفسي ما أبص على رجلي، أنا مكنتش حاسس بأي حاجة في جسمي ولا رجلي، بس حتى الآن مش عارف هل ده بقصد من عصام الوريث ولا مش قصده، لأنه في الآخر طلعني أنا اللي غلطان».
وتابع: «الوريث بيقولي أنت اللي نطيت متأخر، ده أنا الحمد لله أني نطيت متأخر، لو كنت نطيت بدري كنت موت، وحب يعملي كارت إرهاب بشكل غير مباشر عشان معملش حاجة، بعد ما مشيت ورحت لدكتور غيرت على الجرح، دخل عليا داخلة هو وثلاثة أصحابه، وغلطني تاني، أنا اتوترت بقى وكلمت والدي، قالي استنى عندك وأنا جايلك».
