كواليس مهرجان «هات الدكتور عشان يخيط»: اتكتب في ساعة واتشهر في 15 يوما

03:23 م | الأربعاء 07 أبريل 2021

«قلبه جامد إبراهيم الأبيض خد في وشه قام رجع عيط.. هو اللي كان قاعد يتطنط.. هات الدكتور عشان يخيط.. مقدرش غير اللي يقدر.. عكس كده كله هيتسنطر» كلمات من المهرجان الشعبي «إمبابة خط أحمر»، يغنيها ميدو جاد وبيانو، وتعد أشهر الأغنيات خلال الأشهر الأخيرة على مواقع السوشيال ميديا، خصوصا مقاطع «التيك توك».

هناك كواليس وتفاصيل كثيرة خلف هذا المهرجان الذي حظي على شهرة واسعة، وتخطى الـ24 مليون مشاهدة على موقع اليوتيوب: «في شهر 7 اللي فات صاحبي بيانو قال لي تعالى نعمل أغنية عن إمبابة في الأول رفضت وقولت له هنعمل ايه مش هتنجح وقال لي سيبها على الله وفعلا كتبت المهرجان ده في ساعة واحدة بس، وخلص على طول بس مكنش معايا فلوس لتوزيع وتسجيل الأغنية ورفعها على اليوتيوب واضطريت إني اشتغل كتير عشان أقدر أسجل الأغنية وفعلا عملتها وسجلتها»، بحسب «ميدو»، وأصبح مشهورا في 15 يوما فقط: «نمت وصحيت لقيت نفسي تريند ومعروف للناس كلها، وبقت الأغاني بتاعتي بتشير».

يقول «ميدو» إن الأغنية من كلماته وألحانه وتوزيعه، وقد شاركه «بيانو» في الغناء: «الأغنية كانت مكتوبة من شهر يوليو لكن سجلتها في شهر ديسمبر 2020 لحد ما عملت فلوس كويسة واتفاجات انها اتشهرت وشهرتني معها ودلوقتي لما بمشي في الشارع الناس بتيجي تتصور معايا أنا وبيانو ومرة دخلت المطرية معرفتش أخرج من المعجبين كانوا حواليا كتير».

وبدأ «ميدو» في الغناء الشعبي في عام 2011، وله مهرجانين آخرين ولكن لم يحظا بنفس الشهرة الواسعة، منهما «الفكرة في الجمجمة»، وحظيت على مشاهدات وصلت إلى 2 مليون: «نزلت أول امبارح مهرجان جديد اسمه جامد وداخل في الـ300 ألف مشاهدة لحد دلوقتي»، وعادة يكتب المهرجانات في خلال ساعة أو ساعتين، وأحيانا على مدار يومين، ثم يسجلها ويوزعها.