عمرو أديب عن «الاختيار 2»: حضرنا أحداثه كلها بس الناس بتنسى
أديب: إذا مكنتش أنت اللي هتوثق غيرك يوثق
عمرو أديب
قال الإعلامي عمرو أديب، إن مسلسل «الاختيار 2» كشف الخونة كما الأبطال، «الناس نساية وبتنسى أفكرك مين كانوا دول وبيعملوا فينا وفي البلد إيه، وإزاي كانوا بايعين بعض كلهم، أنا أعرفهم بالاسم مين باع مين، كنا موجودين، ولا خجل ولا تراجع وبكل شفافية، أنا بحيي اللي كاتب واللي قرر يعمل الكلام ده، شئ عظيم، ونتابعه الأيام الجاية، ومسلسل جيد وتحب تتفرج عليه عشان فيه اتنين أبطال قرروا أنه مش مهم يبقى مين يبقى البطل، لكن العمل هو البطل، وده بنشوفه عند الأمريكان».
وعلق «أديب»، خلال برنامجه «الحكاية»، المذاع على منصة «شاهد»، على أحد المشاهد في المسلسل والذي أظهر تفكيك القنابل البدائية بجوار أبراج الكهرباء، قائلا: «أنا مرة حضرت واحد وهو بيفك قنبلة قدام محطة بنزين، أنا كنت بعيط، لا كان لابس وقاية ولا حاجة وكان بيقرا القرآن ويفك، وكريم عبدالعزيز ربط الإرهابي في برج الكهرباء، قاله عشان لو راح تروح معاه، الشيخ حسن».
وتابع: «هي دي الدراما وهو ده الفن، وأحنا حضرنا ده كله بس الناس بتنسى، وإذا مكنتش أنت اللي هتوثق غيرك يوثق، فكويس إنك أنت اللي وثقت واللي بتقول، تحية للفن المصري، شوفوا المعارك في المسلسل معمولة إزاي، معارك أحمد مكي والشهيد أحمد فهمي، وحاطين ترجمة إنجليزي، حاجة عظمة، عشان أي حد يتفرج يفهم إيه الحكاية والموضوع، بصراحة كتيبة الفن المصري فيه شغل يتشاف ومعمول فيه شغل».