أديب عن القطارات: «القطر اللي مش جاهز مايطلعش» (فيديو)
أديب عن القطارات: «القطر اللي مش جاهز مايطلعش» (فيديو)
قال الإعلامي عمرو أديب، إن توجيهات الرئيس السيسي بعدم خروج أي قطارات للتشغيل يشابه قرار شركة بوينج في عدم تشغيل طائرات «737 ماكس»، والتي كان بها عيوب تؤدي لسقوطها وتوقفت الشركات في تشغيلها، متابعا: «القطر لو مش جاهز ميطلعش، عن ما حد ركب، مفيش أي مشكلة، إحنا لسه هنتكلم عن العيال اللي بترمي بالقطارات بطوب؟، هذا لن يصلح من الأمر شيء».
وأضاف «أديب»، خلال برنامجه «الحكاية»، المذاع على منصة «شاهد» الإلكترونية، أنه يجب أن يكون هناك وقفة مع الموظفين والعاملين، بحيث يأخذون حقوقهم ونأخذ أيضا حقوقنا، «لو فيه عناصر متطرفة ده شغل الأمن الوطني والشرطة، هي التي تستطيع فلترة وجود عناصر متطرفة، إحنا لغاية دلوقتي ممكن تبقى رايح مصلحة حكومية ولا حاجة وتلقى موظفة تبقى قاعدة وتبص لك من فوق لتحت وبتبقى قارشة ملحتك ومش بتحبك وتبوظلك الدنيا، عارفين الكلام ده».
وعلق على حديث وزير النقل كامل الوزير أمام جلسة مجلس النواب الاثنين عن نقل 162 من العناصر المتطرفة بالسكة الحديد، قائلا: «عاوز تنقلهم ليه؟ طب ما هما لو راحوا أي مكان تاني هينيلوا الدنيا، لو هذا الأمر هو كذلك، أنا بتكلم على كلام الوزير، أنت عاوز تنقلهم فين.. ورش؟ ده أنيل، عاوز توديهم أبراج مراقبة؟ أنيل وأنيل، عاوز توديهم في عمل التذاكر؟ أنيل وأنيل وأنيل، ليه بنتعامل زي اللي عنده سرطان بنقولك هاتهم من المخ ونحطهم في القلب، السرطان يا معالي الوزير بيتقص، وأنا رأيي السرطان الأساسي مش الإخوان، هو الإهمال طبقا لمعالي النائب العام».
وتابع: «الناس اللي تروح تزوير إمضاء واللي ميقعدش في كابينة القيادة واللي يتعاطى مخدرات واللي ميبقاش موجود في برج المراقبة واللي مايشغلش جهاز تحديد السرعة إهمال ثم إهمال ثم إهمال قاتل، وقائد القطار زي قائد الطيارة، وعندنا مصر للطيران ناس بتنقل ناس وبتشوف شغلها وبيتجدد عندنا قطاع محترم، وقطاع السياحة نفس الكلام، إنما لو هنفضل صابرين على العمالة المتطرفة والمهملة طب أومال هنعمل إيه؟، ده هو واحد بيودي البلد في داهية».
