«أديب» يطالب بثورة إدارية في السكة الحديد: موظفوها مثال عبقري للإهمال
«أديب» يطالب بثورة إدارية في السكة الحديد: موظفوها مثال عبقري للإهمال
قال الإعلامي عمرو أديب، إن الناس تشعر بكثير من الإحباط من حوادث القطارات رغم أن معدلات ضحاياها تشابه نفس معدلات ضحايا حوادث الميكروباصات أو الأتوبيسات، «ليه حوادث القطارات بتجيب البلد من الشريان للشريان، وبطالب وزير النقل لو سمحت، وإحنا كلنا وراك، ومحدش ضد الثورة الإدارية، عاوزين ثورة إدارية مش بس في السكة الحديد ولكن في كل القطاعات».
وأضاف «أديب»، خلال برنامجه «الحكاية»، المذاع على منصة «شاهد» الإلكترونية، أن السكوت على الإهمال والفساد والرشوة والمحسوبية ضيَّع البلد لعشرات السنوات، «الجرار ده مين اللي بيسوقه؟ عامل إزاي الراجل؟ لما تقولي أصل هو متعاطي مخدرات طب أخبار الكشف عن البول بتاعه عشان المخدرات إيه؟، بتقولي بيحصل بس مش بيتكشف عارف ليه؟ علشان فيه كومبينة إن البول مايتكشفش ويجيبوا بول حد تاني، قصص غريبة تخلي البلد تدور في حلقة مفرغة».
«أديب»: حوادث القطارات هتفضل موجودة حتى لو جبنا واحد بيقول بابا وماما
وتابع: «بتجيب معدات وعربيات جديدة وفي النهاية ييجي واحد ولا هنا ولا فارق معاه هو نفسه مش حابب شغله والبلد، مش إخوان، غير الإخوان، المتطرفين حاجة تانية، أنت يجب أن تطهر، احنا بنضحي بالقليل عشان العيش الكتير، ودة مبدأ البلد كدة، ولازم نبص على الموضوع بصة شاملة، يكون فيه كلام مع وزير القوى العاملة أو وزيرة التخطيط أو الهيئات الإدارية وجهات التوظيف نعمل إيه».
وواصل: «إحنا مش هنقعد مع الموظفين دول طول الوقت، أنا قولتها من 20 سنة اللي فاتوا البلد دي مش بيخلص عليها غير موظف مهمل، احترامي لكل الموظفين المحترمين وأنا أتحدث عن المهمل، مش هيضيعنا غير موظف مهمل، وأظن السكة الحديد مثال عبقري ويدرس عن الموظف المهمل، وطول ما ده موجود طول ما الحوادث هتفضل مستمرة، حتى لو جبت قطار إلكتروني أو قطار بيقول بابا وماما وتيتة وعمه، الراجل اللي قاعد على المُعدة ده لو مش أمين ويراعي ربنا وعنده ضمير زي غالبية اللي بيعملوا في السكك الحديد».
