عمرو مصطفى: هبقى المغني الأهم في الوطن العربي بعد 5 سنين
قبضت 2000 جنيه على خليك فاكرني وإيرادات الهضبة من فرحين بتاريخي كله
الفنان عمرو مصطفى
قال الفنان عمرو مصطفى، إنه سيصبح الفنان الأفضل في الوطن العربي على مستوى الغناء بعد 5 سنوات، موضحًا: «قلتها زمان في التلحين، وإني هبقى أهم ملحن في الوطن العربي خلال 10 سنوات، ودلوقتي بقول إني هبقى المغني الأهم في الوطن العربي كمان 5 سنين ومش هغني تاني».
وأضاف في حواره مع الإعلامية بسمة وهبة مقدمة برنامج «العرافة»، الذي يعرض عبر شاشة «المحور»: «هنزل أغاني كل شوية، وكل شهر الناس هتلاقي أغنية، لأن النجومية بالاستمرار، ممكن أغنية تضرب وأغنية متضربش، وهشتغل في نفس الوقت لكل المغنيين، وهعمل حفلات بس مش أفراح».
وواجهته العرافة، بواقعة محرجة على الهواء، وقالت له: «مين القمورة بتاعة بيروت اللي بتجري وراك ومجنناك وعاوزاك تلحن لها ومش تشتغل مع حد تاني خالص غيرها؟»، لترد عليها بسمة وهبي ممازحة: «ده أنتِ هتعملي له مشكلة مع مراته».
وعلق عمرو مصطفى قائلا: «مفيش الكلام ده، من وحي خيالها، وعلى فكرة عندي مطربات لبنانيات كتير هعملهم أغاني الفترة الجاية».
وحول تعاونه مع الفنان عمرو دياب، قال: «قبضت 2000 جنيه في خليك فاكرني، و5000 جنيه في أغنية العالم الله، الناس فاكرة إني باخد ملايين، وقبضت 15 ألف جنيه في أغنية ليلي نهاري، ويوم ما اتجننت قبضت 20 ألف جنيه في أغنية أنا عايش مش عايش، ولو جمعنا كل الأغاني دي هنلاقيهم ميكملوش فرحين لعمرو دياب وده بعد 20 سنة شغل، بيروح فرحين بتاريخي كله اللي عملتهوله».