قالوا عن الدرس الخصوصى.. أولياء الأمور: «نار».. والمدرسون: «زينا زى الدكاترة»

إنها «ضريبة سنوية» أصبح التأقلم معها طقساً لا يحتاج شعوراً بالعبء أو التضرر، فلا شىء أهم من النجاح، خاصة إذا كان نجاحاً بطعم التفوق: «الدروس الخصوصية بقت جزء من حياتنا من أول ابنى اللى فى الحضانة لحد بنتى الكبيرة فى ثانوية عامة»! كان هذا جزءاً من حوار يومى بين أم الأولاد السيدة «منال» ووالدهم الحاج أشرف، يبدأ مع بداية شهر يوليو ولا ينتهى حتى إعلان الإجازة الصيفية بقرار وزارة التربية والتعليم، تقول الأم: «المدارس بتبتدى شهر 9 لكن إحنا بنحجز المدرسين من شهر 7 ولو اتأخرنا مش هنلاقى مكان». اتصالات مكثفة بدأت الأم السيدة «منال» إجراءها مع مدرسى أبنائها فى مراحل تعليمية مختلفة، بعد التشاور مع الأب، بعضها انتهى بتحديد موعد بدء الدروس والآخر انتهى بوعد بدراسة الأمر، وهى تقول: «فيه مدرسين ماعندهمش ضمير رفعوا سعر الحصة بزيادة حوالى 20 جنيه للحصة الواحدة، لا وردهم سخيف أوى ده حق بنزين المشوار يا مدام». ارتفاع أسعار الدروس الخصوصية يسرى كذلك على مركز خاص للدروس تذهب له الابنة كل عام فى منطقة حدائق المعادى: «حتى المراكز دلوقتى بقينا نحجزها بدرى، الحصة زى ما هى بـ30 جنيه، بس الملزمة بتاعتها زادت، بدل 10 بقت 20، يعنى الحصة الواحدة بـ50 جنيه.. يرضى مين ده؟». ولكن فى المقابل، يتحدث مستر «م. س» مدرس اللغة الإنجليزية بإحدى المدارس الخاصة، قائلاً: «الناس فاكرة إن المدرسين مش بياكلوا ولا يشربوا ولا بيركبوا مواصلات ولا بيدفعوا هما كمان دروس لولادهم.. إحنا مش ذنبنا إن كل حاجة غليت». ويضيف «م. س» أن «الدروس الخصوصية شىء ليس إجبارياً ومن يريدها فعليه أن يدفع الثمن، إحنا كمدرسين أكتر فئة بنتعب وبتجيلنا أمراض الدنيا من حرقة الدم بسبب الطلبة، والدرس سلعة زى أى سلعة عايز تشتريها فى السوق». ويقارن «م. س» بين مدرسى الدروس الخصوصية والأطباء وأسعار الكشف المرتفعة التى باتت سمة تميز جميع المهن، قائلاً: «الناس اللى بتشتكى من ارتفاع أسعار المدرسين هى اللى بتروح تحجز من شهر مايو عند المدرسين الغاليين زى بالظبط اللى بيروح يكشف عند دكتور بـ300 جنيه بيدفعهم ويخف أول ما يشوف الدكتور حتى لو إداله قرص أسبرين». ملف خاص: الشرائح التى تحدد الزيادة فى المصروفات «الوطن» تنشر مصروفات مدارس الجيزة بالجنيه المدارس «تجريبية ونموذجية ودولية».. الكل فى زيادة المصروفات «سواء» وزير التعليم: المحكمة التأديبية لمن يتورط فى «الدروس الخصوصية» «مراكز الدروس الخصوصية» ترفع سعر الحصة والملزمة بنظام «الشىء لزوم الشىء» «الوطن» تنشر مصروفات مدارس القاهرة بالجنيه «الباص واليونيفورم والتبرعات».. هكذا تتحايل المدارس الخاصة لرفع المصروفات «الغرف التجارية»: زيادة 40% فى أسعار الأدوات الكتابية بسبب الجمارك