محمد السيد مع الفائز بالمصحف والمشتريات
تختلف الأعمال الخيرية من شخص لآخر حسب ظروفه وإمكانياته، لكن محمد السيد، 52 عامًا، جعل عمله طريقًا يستطيع التقرب من خلاله إلى الله، فهو يملك سوبر ماركت وخصص لزبائنه باقة مشتريات بـ300 جنيه مجانًا، في مقابل الصلاة على النبي، ولا ينتظر سوى الأجر والثواب من الله، والدعوة «الحلوة» من الناس لتزيد البركة فيما رزق، وتستمر المبادرة مدى الحياة.
يمتلك «محمد» سوبر ماركت في شارع ناصر التابع لمركز سنورس في محافظة الفيوم، وفكر في توظيف عمله لتشجيع زبائنه على ذكر الصلاة على النبي دائمًا، وعرض الأمر على أخيه الأصغر: «أنا كنت عايز أعمل حاجة لله وقولت لأخويا محسن كان متحمس جدًا وقالي على فكرة نعمل مليونية الصلاة على رسول الله وننشرها على النت، عشان نشجع الناس على الفكرة قررنا اللي يفوز هياخد هدية».
اتفق «محمد» مع أخيه على إعطاء الفائز مشتريات مجانية من السوبر ماركت، ولكن جاءت الحيرة في تحديد قيمة المشتريات أو تركها مفتوحة: «قررنا نخلي الفائز، اللي هيصلي أكتر على النبي في التعليقات، ياخد اللي هو عايزه لحد لما يوصل لـ300 جنيه».
ويسعى «محمد» دائمًا لعمل الخير دون انتظار مقابل سوى الأجر والثواب من الله، وقرر بمناسبة مليونية الصلاة على النبي، أن يعطي الفائز هدية دينية إلى جانب باقة المشتريات: «أخويا قالي نجيب مصاحف كبيرة ونوزعها مع البقالة ».
تفاعل الكثيرون مع فكرة «محمد» وبدأت المنافسة على مواقع التواصل الاجتماعي للفوز بصاحب أكبر مصلي على رسول الله في محافظة الفيوم: «جالنا فائز امبارح خد المصحف والمشتريات اللي هو عاوزها زيت وسكر وشاي ورز ومكرونة وحاجات كتير لحد لما وصل لـ300 جنيه، وبعدين اتصورنا معاه عشان المصداقية قدام الناس».
ينوي «محمد» الاستمرار في هذه الفكرة طوال عمره ولكن مع فروق بسيطة: «هفضل أعمل كده طول ما أنا عايش ومش لازم اللي يفوز على النت، لأ أي حد غلبان هديله، وهخصص المبادرة دي يومين في الشهر أنا عندي 4 شباب ومش عايزين غير الدعوة الحلوة».
تعليقات الفيسبوك