مرض نادر يقتل شقيقين.. والأب يطالب الرئيس بإنقاذ الثالث
آلام وأحزان وعيون محتقنة من كثرة البكاء، لسان لا يكف عن الدعاء طلباً للشفاء من مرض نادر، أسرة بسيطة تحولت حياتها إلى مأساة، بعد أن عجز الطب عن تفسير سبب المرض، أو تقديم حلول، إنه مرض نادر يصيب شخصاً واحداً من بين كل مليون شخص فى العالم، اختار أطفال محمد مسعد عيسى، الذين مات منهم طفلان، هما «سعد» و«هند»، وما زال الصغير «محمد» فى الانتظار. تقول الأم: «نفسى أشوف ضناى بيمشى على رجليه، أنا تعبت من كتر البكا، وحياتى بقت مرار، أنا وزوجى، فمنذ 9 سنوات، وبعد ولادة طفلى الأكبر «سعد» بعامين، أصيب بضمور فى المادة البيضاء بالمخ، وهو مرض لا علاج له فى مصر، وبعدين أصاب شقيقته «هند»، وتوفى الطفلان بعد سنوات من العذاب، صبرت على بلائى، وأكرمنى الله بطفلى «محمد»، وكان طبيعياً، بيمشى، وبيتحرك، ويلعب زى كل الأطفال، وفجأة بقى غير قادر على الحركة، وهو لسة فى سن صغيرة». وتضيف: «رحنا لكل الأطباء المتخصصين فى القاهرة ودمياط، وأجمعوا على إصابته بنفس المرض اللى خد أخوه، ومش قادر يمشى أو يقعد أو ينطق أو حتى يحرك إيده، ويتواصل مع الآخرين بحركة عينه بس». وناشد الأب الرئيس عبدالفتاح السيسى سرعة التدخل، وإنقاذ طفله، الذى يتألم منذ ما يزيد على أربعة أعوام، يصارع فيها الموت ليل نهار، ويعبر عن وجعه بحركة واهنة من عينيه. وأضاف: «أنا بعت اللى وراى واللى قدامى، ومش قادر على مواصلة عملى، وبعتّ جواب لأحد المستشفيات الكبرى فى ألمانيا، أكدوا لى أن علاج طفلى ممكن ويتكلف 180 ألف يورو».