100 أسرة فى «التجمع» تحتفل بأجمل «طبق سلطة»
وسط أطباق من السلطات المتنوعة، شارك سكان كمباوند فى التجمع الخامس، فى أول احتفالية لاختيار أجمل «طبق سلطة» بين الأهالى المهتمين بالخضراوات وفوائدها.. «يوم للتذوق، وتلقى دروس فى السلطة، والتعرف على الجيران أكتر، وتلقى محاضرات، والمشاركة فى شوى المأكولات»، يتحدث محمد عرفان، أحد المشاركين فى المسابقة، مشيراً إلى وجود الكثير من المعلومات الغائبة عن السلطة: «فيه طبخات ماتبقاش حلوة إلا بالسلطة، وأنواعها وفوايدها كتيرة لدرجة إنها ممكن تتاكل مع المخبوزات بس».
المسابقة شهدت اختراع أنواع سلطات جديدة، يقول «عرفان»: «عملنا سلطات مثلجة، عبارة عن طماطم وجزر وخيار مضروبين فى الخلاط وحطيناهم فى الفريزر، وحطينا عليهم سلطة زبادى، ودى سلطة فوايدها كتير، فضلاً عن السلطات المعروفة، بس بطرق مختلفة وعرضها بطريقة تخلى اللى مابيكلهاش ياكلها ويحبها».
شارك فى المسابقة 100 أسرة، وانتهت بجوائز لأجمل «طبق سلطة»: «كانت المراكز على حسب التصويت على أجمل طبق سلطة، من حيث نوعه وشكله، وفازت مشاركة بالمركز الأول وقدمنا لها طبق مشاوى باربيكيو هدية لأسرتها».
وأكد «عرفان» أنه سيتم تكرار المسابقة كل فترة: «إحنا فكرنا نعرف جيرانا أكتر والأسر تعرف بعضها، وعشان السلطة ليها فوائد كتير قررنا نتجمع بمسابقات هدفها السلطة، عشان يبقى فيها ابتكارات فى كل مرة تخلى الناس تحبها وتعرف فوايدها».