مشجعو الزمالك يوثقون شهاداتهم عن أحداث "الدفاع الجوي" على "فيس بوك"

نشر بعض مشجعي الزمالك شهاداتهم حول مجزرة استاد الدفاع الجوي، عبر الحسابات الشخصية لهم على مواقع التواصل الاجتماعي. "شهادة هتحاسب عليها يوم القيامة" هكذا بدأ باسم نوفل شهادته عن الواقعة، يصف الوضع من موقعه داخل الممر الحديدي الذي ظهر أمس أمام بوابة الاستاد المخصصة لدخول الجماهير، يقول: "الداخلية كانت موقفة كل الجماهير في ممر طويل جدا وصغير على العدد الكبير اللي كان موجود، وبيدخلوا واحد واحد الاستاد بعد ما يتفتش، بعدها جت عربية نص نقل تبع الداخلية كانت عايزة تخرج من الاستاد من الممر اللي إحنا واقفين فيه، ووقفت في نص الممر وبعدها بـ5 دقايق خرج رتبة ماشوفتش غير 3 نجوم على كتفة، وكان عايز يخرج ومعاه 10 عساكر، تقريبا واحد منهم كان معاه رشاش و2 معاهم البندقية اللي فيها قنابل الغاز والباقى عصيان، قعدوا يضربوا فينا وينزلونا من رصيف صغير جنب الممر كنا واقفين عليه، طبعًا الناس اتزنقت والزق بدأ لحد ما واحد ولع شمروخ". ويتابع "الداخلية ضربت غاز على الآلاف اللي واقفين، الناس بدأت تجري عشان تخرج واللي في الصف الأخير بقوا هما اللي في الصف الأول، والناس بدأت تقع وقعت فوقيهم والناس كانت بتدوس على بعض عشان تخرج". وقال عبدالرحمن بن كمال: "مكنش في غير ممر واحد لدخول الاستاد، الممر ده عرضه بالظبط لا يتعدى الـ4 أمتار بس كان طويل، واقف فيه حوالي 8 آلاف واحد بأقل تقدير، كنا واقفين مستنيين الأمن يدخلنا ومرة واحدة اتضرب غاز علينا، حصل تدافع رهيب من ريحة الغاز، لأنه بيحرق الوش وناس وقعت على الأرض واتداس عليهم، وأنا كنت من ضمنهم بس كان في ناس تحتي، واحد طلع في الروح وأنا كنت بتشاهد، عدد اللي ماتوا أقل تقدير 20 واحد".[FirstQuote] ضياء الرحمن يقول: "فضلت ماسك في السور ربع ساعة، شباب كتير كانت تحتي، عمالة تقولي الحقني امسكنا يا كابتن، وأنا ماعرفتش أعملهم أي حاجة، بعد ما العلقة خلصت، وعدد الناس قل سبت السور، ونزلت الشارع، كان كله مفروش جزم وشنط وشباب مرمي على الأرض، كنت بحاول أوهم نفسي إن الناس لسه فيها روح وبحاول أفوقهم، شعور بالعجز والخوف والجبن، جريت وركبت في أتوبيس وسايب ورايا شهداء". فيما عبَّر رامي ياسين عن عجزه عندما وصف استغاثة أحد مشجعي نادي الزمالك أمس به: "عيل عنده 16 سنة فضل ماسك فيا وقالي متسبنيش لو وقعت هموت، قولتله اهدى وحياة ولادي ماهسيبك.. بقي يزقني وقالي امشي امشي عشان ولادك".