سمسار خادمات: أصحاب البيوت بيخافوا من الأجنبية بسبب «مشاكل جنسية»

«بنات الأرياف أساس مهنة الخادمات، فالخدمة فى البيوت توفر لهن ولأسرهن عائداً مادياً كبيراً لا توفره الوظائف الحكومية إن وجدت».. هكذا يقول «فتحى»، سمسار الخدمات، لـ«الوطن»، مشيراً إلى أن معظم أصحاب البيوت يخافون من التعامل مع الأجنبيات، ويرون أن الخادمة المصرية أحسن من الأجنبية بمبدأ «اللى نعرفه أحسن من اللى منعرفهوش». ■ حدثنا عن طبيعة عملك؟ - أنا وسيط بين أصحاب البيوت وبين الخادمات، وشغال فى المهنة دى من 20 سنة، وبوفر لكل زبون طلبه سواء كان عايز خدامة لتنظيف البيت أو مربية أطفال، بيحصل ده بحكم خبرتى فى المهنة من زمان وبحكم معرفتى بالبنات اللى محتاجين شغل، الناس فاكرين إن شغلنا سهل، لكن الحقيقة إحنا بنتعب لغاية ما نوصّل للزبون طلبه، وبنلف من بلد لبلد وبنعمل اتصالات لغاية ما نوفر له البنت اللى بالمواصفات المطلوبة، ومقابل ده باخد عمولتى المتفق عليها شهر من مرتب البنت. ■ لماذا تعتمد على بنات الأرياف فى هذه المهنة؟ - بنات المدن متعلمين ومش محتاجين شغل، ولما بيحبوا يشتغلوا بيلاقوا شغل فى شركات كبيرة ومكاتب، لو مكانش بالتعليم، على الأقل بيكون بمظهرهم، لكن بنات الأرياف لا تعليم ولا شكل، ولا حتى بيعرفوا يتكلموا، لكن شاطرين فى شغل البيت وتربية الأطفال، وكل البنات اللى بشغلهم أهاليهم همّا اللى بيطلبوا منى أدور لهم على شغل، وأنا حريص على البنت زى ما أنا حريص على إنى أكسب الزبون، وبشغلهم عند ناس محترمين، وفى النهاية هم بينفعوا نفسهم وبيصرفوا على أسرهم. ■ على أى أساس يتحدد مرتب كل بنت؟ - أنا مش فى المهنة دى من النهاردة، أنا وارثها عن أبويا، والأسعار معروفة وبتتحدد على أسس ثابتة، وكمان الناس مش أول مرة تطلب شغالات وعارفين الأسعار، يعنى البنت اللى عندها مثلاً 14 أو 15 سنة ومبتعرفش تعمل أكل يادوب بتساعد ست البيت فى التنظيف، ودى مرتبها بيكون من 700 جنيه لـ1000 بالكتير لو صاحب البيت كريم، أما البنت اللى فوق العشرين فدى بيكون سعرها كويس لأنها بتقوم بكل حاجة فى البيت: كنس ومسح وطبخ حتى رعاية الأطفال ودى مرتبها يبدأ من 1400 إلى 1700، وعندى بنات معاها ليسانس وبكالوريوس دول مرتبهم ممكن يعدى الـ2000 جنيه لو عجبت الزبونة. ■ هل وجود الخادمات الأجنبيات أثر على سوق الخادمات المصريات؟ - مش بشكل كبير، لأن معظم الناس فى مصر بيحبوا يتعاملوا مع الناس اللى بيعرفوهم، واللى يعرفوا أصلهم وفصلهم، وإحنا لنا زباين من سنين، ده غير إن أصحاب البيوت بيخافوا يتعاملوا مع الأجنبيات بسبب مشاكلهن الجنسية، والخادمة المصرية أحسن من الأجنبية بمبدأ اللى نعرفه أحسن من اللى منعرفهوش.