"العقد" بيضحك ليه

فيروز ولؤلؤ وعقيق وأونكس.. أحجار تحولت بين يديها إلى لوحات فنية رائعة، اتخدت من أعناق النساء معرضاً لها، «داليا مدكور» مصممة حُلىّ، تعشق خاماتها حتى أصبحت بالنسبة لها رابع أبنائها، فما بين خاتم يحمل قرص الشمس، وتميمة تجسد إله المصريين القدماء، و«كردان» يعود أصله إلى الريف المصرى، تأخذك حلى «داليا» فى جولة تمتزج فيها الأصالة والعراقة والفن. تصميم الحلى ليس مهنة فحسب، فالسيدة التى درست الفنون الجميلة لم تكتف بدراستها وعملت على صقل موهبتها فى مجال تصميم الحلى بدراسات تكميلية. تعشق «داليا» قطع الحلى إلى حد التوحد: «لما باكون فى حالة مزاجية جيدة ومبسوطة بحس أن التصميم بيضحك ومبهج ولو باكون حزينة بحسه كله شجن، كل تصميم وله سحره اللى بيخلى تصميم يخلص فى ساعة أو أكتر من يوم، خاصة شغل النحاس لأنه بيحتاج مجهود كبير». الجهد الذى تبذله «داليا» فى الورشة الخاصة بها يتبدل إلى سعادة عندما تلمح نظرات إعجاب الناس بما تصنعه: «فى الغالب الأجانب أكتر ناس بتقدر الشغل ده، بيستغربوا من جودة وإتقان الشغل اليدوى وده بيخلينى فخورة، لدرجة إنى ممكن أبيع القطعة بسعر التكلفة وأنا سعيدة، لأنها هتكون فى إيد شخص يقدر قيمة التعب اللى فيها».