أمير يجوب مصر بـزقزوقة.. ويستعد للسفر بها لأداء مناسك العمرة

07:11 م | الأربعاء 12 أغسطس 2015

"خوذة ودراجة" الأدوات التي لازمت أمير عبدالمجيد طالب بالفرقة الثالثة فى كلية تجارة شعبة اللغة الإنجليزية ليجوب مصر بالدراجة، بعد أن اكتشف أنه لم يعرف أن طنطا مدينة داخل محافظة الغربية، ليقرر أن يجوب على خريطة بلده بالدراجة ليجمع المعلومات عن محافظات مصر.

البداية كانت من مشروع 2% فى مؤسسة صناع الحياة، وكان يهدف إلى إعداد 100 قائد على مستوى جمهورية مصر العربية، وبعد 6 شهور تدريب، توجه إلينا سؤال "هتبقى قائد إزاى وأنت مش عارفة خريطة بلدك.. واتطلب مننا أننا نرسم خريطة مصر.. بحكم أنى من أسوان قدرت أرسم الخريطة من أسوان للقاهرة بشكل جيد، بس فى مدن كتير كنت فاكرها محافظة ومكنتش عارف أحطها فين على الخريطة مكنتش أعرف أن طنطا مدينة داخل محافظة الغربية.. واللى كانوا من بحرى مكنوش عارفين أسوان فين على الخريطة.. محدش فينا كان عارف الخريطة وبسبب اللغبطة دى اتطلب مننا نجمع معلومات عامة عن المحافظات".

واستكمل حواره بإنه بدأ بالتفكير فى وسيلة جديدة يجوب من خلالها المحافظات لجمع المعلومات ويعرف خريطة بلده "فكرت فى القطر ومحستش أنى هستفيد منه، وساعتها كان وقت الامتحانات لما خلصت كنت قررت إنى أسافر من أسيوط لأسوان بالدراجة كانوا 7 محافظات".

وبعد ما انتهى من فترة الامتحانات دخل "أمير" على الصفحة الخاصة لمؤسسة صناع الحياة، ووجد الكثير يشجعون فكرته، ووجد من يسخر منه ويقول "آخرك هيبقى مركز أبو تيج المركز قبل الأخير في أسيوط"، ولكنه أصر ليكون شهر سبتمبر 2014 هو بداية انطلاقه من أسيوط، واصطحب معه "مروة عاصم" وهي الدراجة التى استقلها في سفره "اسم الدراجة كان مروة عاصم، لأن المستورد كان حافر اسم بنته على الدراجة بس مكنتش عارف أنها هتتعبنى في الرحلة".. وزنها كان 47 كيلو وكان ليها مساعدين مكنتش أعرف أنهم هيشدوا العجلة لورا".

استقل دراجته وبدأ السير من أسيوط لسوهاج "بعد ما دخلت مركز طما ودا كان أول مركز في سوهاج قبلت كمين وكنت لابس شورت جينز وتى شيرت وخوذه مكنش شكلى بيدل على إنى أجنبي فجأة لقيت أمين الشرطة بيسألني عن اسمي بالإنجليزي حاولت أقنعه إني مصري، ومقتنعتش غير لما شاف البطاقة الشخصية وكود الرقم القومى للمحافظة.. والمشكلة اتحلت".

من أولى جولاته والمواقف التى رآها كانت سببًا فى توصيل معانٍ كثيرة لديه "اتعلمت حاجات كتير وكانت أولها كان اختلاف وجهات النظر.. فى الأول لما سألت سواق نقل ناقص أد إيه على سوهاج قالى ناقص حوالى 40 كيلو، وبعد شوية وقفت على كافتيريا وسألت راجل كان لابس بدلة نفس السؤال رد عليا وقالى بالدراجة يبقى حوالى 4 ساعات، وبعدها مشيت شوية ريحت تحت شجرة ولما سألت راجل هناك قالى ناقص حوالى 5 مراكز علشان توصل.. الفكرة إن الإجابات كلها كانت صح بس كانت مختلفة عن بعض ودى أكتر حاجة اتعلمتها".

التعب الجسمانى الذى ناله أثناء الرحلة جعله يتعلم متى يضع هدفه وحلمه "من أسيوط لسوهاج حوالى 100 كيلو وعند الكيلو 80 تعبت أوى وقعدت أعيط وافتكرت كلام صاحبى اللى قالولى مش هتقدر تكمل.. كنت ماسك ساعتها موبايلى وكنت عامل ايفنت على الفيس اسمه (رحلة مصر بالعجلة) لقيت ناس كتير بعتولى بيشجعونى على إنى أكمل الرحلة".

ذهب إلى محافظة سوهاج ليستقبل مكالمة تليفونية من أحد المعجبين به يطلب منه أن يستكمل معه رحلته من أسيوط إلى أسوان "فجأة لقيت واحد بيكلمنى علشان عاوز يكمل معايا الرحلة لغاية أسوان، طلبت منه أن يحضر ويأتى بعجلته لأكشف عليها".

مواقف كثيرة رآها "أمير" مع صديقه فى جولته الأولى كان أبرزها حادث الثأر الذى شاهده فى سوهاج "كنا ماشيين وفجأة لقينا ضرب نار وقفنا علشان نوقف عربية مكنش فيها غير مكان واحد، ركبت صحبى قدام وأنا ركبت ورا مع العجلة وكنت مستخبى تحت شوال.. وفجأة لقيت العربية بتروح وتيجى وأنا معرفش فى ايه ولما خرجنا وسألت صحبى قالى كانوا عاملين زى اللى بيرقصوا على أغنية سهر الليالى فى آخر الفرح بيضربوا بعض بالنار واحنا ماشين بينهم".

ومن قنا للأقصر ظل التعب الجسمانى لم يفارقه، ليطلب منه صديقه أن يكتفي بالقدر الذى حققه "من قنا لأقصر حوالى 220 كيلو وفضلنا ماشيين وعند الكيلو 210 تعبنا فرشنا سجادة الصلاة علشان ننام، فنمت ومقومتش ولقيت الناس حواليا بتفوقنى.. وطلب منى السلحدار أنى أكمل الرحلة بالعربية قولتله مستحيل أعمل كدا أنا مش ناقصلى غير 10 كيلو".

انتهت جولته الأولى عند أسوان، ويفى وعده مع صديقه الذى اتفق معه أن يقضى معه الرحلة حتى أسوان، ليبدأ أمير التفكير فى جولة جديدة يجوب مصر، ولكن هذه الجولة الجديدة دون "مروة عاصم"، "قعدت أبحث على جوجل لقيت اتنين سافروا من إفريقيا لمكة بالدراجة وفضلوا فى الرحلة دى 9 شهور، لأتخذ القرار باستكمال الرحلة وألف مصر كلها بالدراجة، فضلت أحوش فلوس علشان أشترى دراجة بإمكانيات أقوى".

الدراجة "زقزوقة" هى الدراجة الجديدة التى جابت معه مصر "اخترت الاسم من واحدة صحبتى اقترحت عليا هذا الاسم".

وكان 22 مارس 2015 هى بداية الجولة الثانية التى بدأها من أسيوط لسانت كاترين، فى بداية الأمر قرر أن يذهب من أسيوط إلى المنيا بالطريق الصحراوى ولكن الرياح الشديدة المعاكسة لاتجاه كانت السبب فى تراجعه عن هذه الرحلة، ويستكمل رحلته بالطريق الزراعى.

لتنتهى آخر جولاته فى سانت كاترين، وقبل أن تنتهى كان على موعد مع جبل "شق الثعبان" فى طابا ووجد فيه المزيد من الألوان العجيبة التى أبهرته.

نال "أمير" الكثير من تعليقات الناس منها ما كان يشجعه ومنها ما كان يسخر منه، ولكنه أصر على أن يستكمل رحلته مع "زقزوقة".

وبعد أن أنهى رحلته، دخل فى إحدى المغامرات الجديدة وسافر من أسيوط لسوهاج بالعجلة فى رمضان الماضى وهو صائم دون أن يفطر.

لم يتوقف أمير عند هذا، ولكنه الآن يريد أن يسافر من مصر إلى السعودية لأداء فريضة الحج بالعجلة، "كل اللى محتاجه التأشيرة لكن تكاليف سفرى أنا عندى الراعى الرسمى للرحلة.. وبتمنى من الدولة أنها تساعدنى علشان أخد التأشيرة".