في حلقة نقاشية خفيفة الطابع، طرحت الإعلامية إيمان عز الدين سؤالًا شائعًا: «هل النساء يعرفن كيف يكذبن؟»، لتفتح بذلك بابًا واسعًا للنقاش حول الفروق بين الجنسين في التعامل مع الحقيقة والمشاعر، وسط تفاعل لافت من الجمهور.

الكذب كأخلاق لا كنوع

وقالت عز الدين، خلال تقديمها برنامج «الستات مايعرفوش يكدبوا»، على قناة cbc: «المرأة كائن شفاف ومعبّر عن مشاعره، وده ممكن يخليها تظهر بشكل يبدو إنها ما بتعرفش تكذب، لكنها في الحقيقة قادرة على ذلك زيها زي الراجل، لأن الموضوع مش نوع، لكنه أخلاق وتربية».

وأضافت مازحة: «الراجل بيروح شغله وهو مش رايح، ويرش برفان جديد، ولما مراته تسأله: رايح فين؟ يرد ويقول: الشغل، وفي الحقيقة هو بيخاف من غيرتها، فبيكذب تفاديًا للمواجهة».

وقدّمت الإعلامية منى عبدالغني مداخلة، مؤكدة: «بعتنا السؤال لـ(شات جي بي تي) وقلنا نشوف رأي التكنولوجيا، وجاء الرد واضح: الكذب لا علاقة له بالنوع، بل بالشخص نفسه، وأخلاقه، وبيئته».

وتابعت عبدالغني: «النساء أحيانًا بيكذبوا بدافع العطاء، مثلًا، لما تقول المرأة إنها بخير وهي مرهقة فقط علشان تريح زوجها، أو لما تخفي احتياجاتها المادية في نهاية الشهر علشان ما تثقلش عليه، فده مش كذب، لكنه نوع من التضحية والصبر».

وأكدت الإعلاميتان أن النساء غالبًا ما يُكتشف كذبهن بسرعة بسبب تركيزهن على التفاصيل الدقيقة، ما قد يؤدي إلى تضارب في الأقوال.

ووجَّهت عز الدين رسالة للنساء قائلة: «لو الزوج راجع من يوم مرهق، أجلي أي أخبار سلبية تخص الأولاد أو البيت، وخليه يرتاح، ده مش كذب.. دي حكمة».

كما وجهت رسالة للرجال: «لو أنت ماشي في السليم، ما ترتبكش، لأن الارتباك بيخلي الست تشك حتى لو ما فيش حاجة، والست عندها رادار داخلي، بيكشف الكذب حتى لو ما قالتش».

الثقة ركيزة العلاقة

واختتمت عبدالغني النقاش برسالة مهمة: «الثقة أساس العلاقة، الراجل يقدر يطمن مراته بأفعاله، مش بالكلام بس، ولما الست تحس بالأمان العاطفي، هتعيش في سكينة، وده هينعكس على كل جوانب البيت».

• الكذب
• المرأة
• الرجل
• الثقة