فرحة المزارعين بحصاد البطاطس.. أجرة وتخزين «رزق البيوت»
فرحة المزارعين بحصاد البطاطس.. أجرة وتخزين «رزق البيوت»
فى قلب الحقول الخضراء حيث يمتزج التراب بالعرق والصبر، تبدأ حكاية يوم «خير» مع أول خيوط الفجر، ترويها نساء إحدى القرى بالغربية، إذ يقطع سكون نومهن مواعيد العمل التى يلتزمن بها، يبدأ اليوم مع بزوغ الفجر وأداء الفريضة ثم تناول لقيمات سريعة تمنحهن طاقة لقطع الطريق الطويل، بعدها، يلتقين بصاحب الأرض، وتُفتح صفحة جديدة من العمل، فى حصاد ثمار البطاطس، التى تستمر قرابة 3 أشهر «مايو، ويونيو، ويوليو»، يبذلن فى ذلك مجهوداً جباراً مقابل فرحة بسيطة وأموال تدخل بيوتهن، يجلبن بها الحلوى أو الملابس أو حتى مستلزمات البيوت.
صفية محمد، إحدى المزارعات فى محافظة الغربية، تحكى لـ«الوطن» كواليس موسم حصاد البطاطس للسيدات، بأنها تعمل فى حصاد البطاطس منذ قرابة 10 سنوات، وسط مجموعة من السيدات «الأنفار»، كما وصفتهن، قضين نحو 30 و40 عاماً فى هذا المجال: «بنصحى من بدرى، نعمل لنا ساندويتش ونصلى الفجر ونتجمع وننزل، بنقوم قبل الفجر، بييجى صاحب الأرض ياخدنا ونمشى، ونرجع الصبح على 10 أو 11 نعمل لقمة وننضف بيوتنا، لو فيه شغل فى أرض تانية بنروح العصر كده، بيكون مواسم مش طول السنة بنضغط على نفسنا اليومين دول مهما كان التعب».
وتروى «صفية» أن حصاد البطاطس يكون فى الساعات الأولى من الفجر، لأن ثمرة البطاطس يجب حصدها فى وقت مبكر والأرض رطبة: «لازم يكون شغلها بدرى قبل الشمس ما تطلع، والجو هادى، أوقات بنطلع قبل الفجر، أما الحصاد فبيكون كل 6 شهور والزرعة بتطلع مرة فى السنة، بس بتختلف حسب توقيت زراعتها، بيكون فيه جرار بيطلع الثمرة من الأرض، وبنجرى نلم من وراه قبل ما يلف، وييجى ورانا، وبنشيل فى قفة ونفضى فى شيكارة، ووقت التحميل لازم يكون فيه رجالة عشان بيكون تقيل».
ومع كل هذا الجهد الكبير تكون فرحة المزارعين وقت تسلم أموالهم ونصيبهم من الثمر، إذ تقول: «بالنسبة لنا هى موسم رزق بنخزن منها طول السنة، فى الأراضى لما نروح بيدونا عرق الشغال، حسب اللى يطلعه صاحب الأرض، ممكن كل اتنين فى شيكارة، أو كل واحد (غلق) ودى بتكون زى القفة بس أكبر شوية، بيعايرها ويديها لنا، بنخزن طول السنة بطاطسنا من الموسم وزيها شغلنا من البطاطس واللوبيا والكمون، بنروح نشتغل، وصاحب الأرض يدينا كل واحدة منابها، بنقعد طول السنة مخزنين ده وما نشتريش من برة، ربنا بيوسعها علينا فى الموسم ده، كنا الأول بنزرع البطاطس ونغطيها ونشتغل كل خطواتها لحد الحصاد، دلوقتى بقى المكن بيوفر علينا كل ده».
مصطفى القلينى، فلاح ومزارع بطاطس، أوضح لـ«الوطن» مواعيد زراعة البطاطس، التى تبدأ فى شهرى ديسمبر ويناير، ويتم حصادها فى مايو ويونيو ويتم تخزينها فى الثلاجات، وهناك نوع يُزرع فى شهر أكتوبر وهى المصرية، وتختلف طريقة الحصاد فى الأراضى الجبلية عن الأراضى الموجودة فى الدلتا، والأراضى فى محافظات الدلتا أيضاً هناك اختلاف فيما بينها، أما جودة المحصول فتكون أفضل فى الجبلية، بسبب نظام الرى والعناية والحصاد.
