موسم عيد الأضحى ينعش مخابز «كفر الشيخ».. «الكحك» VS «الفتة»
موسم عيد الأضحى ينعش مخابز «كفر الشيخ».. «الكحك» VS «الفتة»
- كفر الشيخ
- بيلا
- المخابز الأفرنجية
- عيد الأضحى المبارك
- عيد
- عيد الأضحى
- كحك العيد
- السمن البلدي
- موسم عيد الأضحى
مع بداية شهر ذي الحجة انتعشت حركة الإنتاج في المخابز الأفرنجية، مع إقبال الزبائن على شراء «القراقيش البلدي والكحك»، مع قرب حلول عيد الأضحى المبارك.
في أحد المخابز الأفرنجية بمدينة بيلا بمحافظة كفر الشيخ، وقف صبري النمر، وشقيقه طه، يعدان «القراقيش»، وبجانبهما مساعدهما محمد دشيش، كانت مهمته هي «نقش» الكعك، استعداداً لخبزه وتسليمه إلى الزبائن، الذين يحرصون على تناول هذه المخبوزات الطازجة صبيحة يوم العيد في عادة سنوية اعتادوا عليها، وتأجيل تناول اللحوم والفتة إلى وجبة الغداء.
«النمر»: عيد الأضحى موسم بس مش زي موسم عيد الفطر
يحكي صبري النمر، صاحب المخبز الأفرنجي، عن الاستعدادات لموسم عيد الأضحى المبارك: «عيد الأضحى موسم، بس مش زي موسم عيد الفطر، العيد الصغير بيكون أقوى، لأن الناس بتعمل كحك وبسكويت وبيتى فور وغُريّبة، أما في عيد الأضحى فبيكون الإقبال أكتر على القراقيش السادة والعجوة والكحك والبسكويت على قد كيلو من كل نوع لكل أسرة، وأكتر الناس بتاخد المخبوزات علشان تودي مواسم لأولادها لأنها عادة في الأرياف إن في كل عيد لازم يروح حمولة للبنت وبتكون كلها أكل وشرب».
يحتفظ طه النمر وشقيقه بصناعة المخبوزات بشكل يدوي دون أي تطوير رغم انتشار الماكينات الآلية باستثناء الفرن الآلي الكهربائي الذين حرصوا على جلبه للحد من استهلاك أنابيب الغاز: «شغالين شغل زمان، بنعمل كل حاجة بإيدينا؛ العجين والنقش والتقطيع ورص الصيجان والخبيز، زى ما اتعلمنا لأول مرة سنة 1998، يعني من 27 سنة، وإحنا مش حابين التطوير ده لأننا أخدنا على الشغل ده من سنين وارتبطنا بيه، والحمد لله ربنا بيرزقنا وبيراضينا».
«دشيش»: الموسم ده بيكون فيه شغل كتير
15 ساعة يومياً، هي مدة العمل في المخبز الأفرنجي، بحسب محمد دشيش: «بنشتغل من الساعة 8 الصبح لحد الساعة 11 بالليل، لأن الموسم ده بيكون فيه شغل كتير، والإقبال على شراء المخبوزات بيكون كبير، والمواسم دي خير علينا كلنا، وبنستناها من السنة للسنة، وربنا ما يقطعها عادة».
تحرص الكثير من السيدات على عمل «القراقيش البلدي والكحك» في المنزل، ومن ثم الذهاب بها إلى المخابز الأفرنجية لتسويتها، ومنهن اعتماد موسى، التي تقول: «عيد الأضحى عندنا زي عيد الفطر لازم نعمل الكحك بس بنعمل جنبه القراقيش اللي بتكون بالسمنة البلدي، وبنبدأ تجهيزات في البيت لأنها بتكون فرحة كبيرة للأطفال والكبار، وبعد كده بنودي الحاجة تتخبز في المخبز، إحنا متعودين نفطر صباح العيد حاجات خفيفة ونطلّع منها كمان للضيوف مع تسالي العيد، وبنعمل كمية تكفينا العيد وممكن كمان تفضل لحد بعد العيد».
