ساندوتش هدية.. مبادرة مطعم فول وطعمية لطلاب الثانوية العامة: «فرحة لولادنا»

07:51 م | الأحد 22 يونيو 2025

مع بدء ماراثون امتحانات الثانوية العامة، قرّر القائمون على أحد مطاعم المأكولات الشعبية في مدينة بيلا بمحافظة كفر الشيخ منح طلاب الثانوية ساندوتش مجاني على كل أوردر خلال أيام الامتحانات دعماً للطلاب، ولإدخال السرور على قلوبهم.

يحكي الدكتور محمود عثمان، أحد القائمين على المطعم، لـ«الوطن»، عن هذه المبادرة: «مع انطلاق ماراثون الامتحانات فكرنا إزاي نفرّح الطلاب لأن المطعم عندنا بيكون عليه إقبال من الطلاب اللي بيحبوا الأكل الشعبي، عشان كده قررنا نطلّع على كل أوردر فطار أو غداء ساندوتش فول أو طعمية مجانى للطلاب حتى لو الأوردر بجنيه وده لحد آخر يوم في الامتحانات».

تحمل المطعم تكاليف الساندوتش المجاني الذي يتم منحه للطلاب بحسب «عثمان»: «تكلفة الساندوتش الواحد 6 جنيه وإحنا اتحملنا التكلفة دي، وحقيقي فرحة الطلاب وإننا ننسيهم الضغط شوية من الحاجات اللي بنسعى ليها، لأنهم ولادنا ولهم حق علينا».

قبل امتحانات الثانوية العامة استعد مطعم المأكولات الشعبية لهذا الموسم وفقاً لـ«عثمان»: «زودنا العمالة، وكمان جهزنا كل المنتجات اللازمة زى الفول والخضار والعيش لأن موسم الامتحانات بيكون الإقبال فيه كبير، عشان كده بنستعد للموسم ده بدري، وبيكون موسم خير، وربنا يوفق ولادنا ويفرّحنا بيهم».

فرحة كبيرة انتابت طلاب الثانوية العامة بعد المبادرة التي أطلقها مطعم المأكولات الشعبية بمدينة بيلا، ومنهم محمد حافظ، الذي عبّر عن سعادته: «مبادرة جميلة، وفرحانين إن في حد بيفكر فينا وحابب يفرحنا، أنا لازم قبل كل امتحان أفطر الصبح بدري، ولما رُحت المطعم أول يوم امتحان اتفاجئت إن في على الأوردر ساندوتش هدية، ودي حاجة فرحتني لأن رغم إن المطعم عليه إقبال كبير يعني مش محتاج دعاية إلا إنه فكر يفرّحنا ولو بحاجة بسيطة».