أكبر طلاب الإعدادية.. حلاق كفر الشيخ يقهر الأمية ويحلم بالإعلام
أكبر طلاب الإعدادية.. حلاق كفر الشيخ يقهر الأمية ويحلم بالإعلام
- الشهادة الإعدادية
- نتيجة الشهادة الإعدادية
- كفر الشيخ
- بيلا
- أكبر طالب والإعدادية
- أكبر طالب بالإعدادية
- محافظة كفر الشيخ
- عوض سامي
- قرية الترزي
- الإعدادية
بخطوات ثابتة وطموح لم يذبل، استطاع عوض سامي، 54 عاماً، ابن قرية الترزي التابعة لمركز بيلا في محافظة كفر الشيخ، والملقب بـ«أكبر طالب في مصر»، تحقيق حلمه في الحصول على الشهادة الإعدادية بعد نجاحه بمجموع 190 درجة من أصل 280 درجة.
حلاق كفر الشيخ يقهر الأمية ويحلم بالإعلام
في عام 2022 التحق «عوض» بالتعليم الإعدادي عقب حصوله على شهادة محو الأمية، بعد أن تحدى الواقع وتغلب على التنمر من أميته، وخصص وقتاً لعمله في مهنة «الحلاقة» ورعاية أبنائه الثلاثة ووقتاً آخر لاستكمال تعليمه: «أنا مدخلتش مدارس وأنا صغير لأن أسرتي كانت عايزاني أتعلم صنعة، لكن لما كبرت شوية دخلت محو الأمية عشان لو فيه فرصة عمل بس وقفت لحد كده، لحد ما فكرة استكمال تعليمي جت معايا كتحدي لما جه ناس بيسألوا عني في البلد وبيقولوا عايزين بيت أستاذ عوض، فواحد يعرفني قال لهم عوض اللي انتوا عايزينه مش أستاذ ما راحش مدارس، وعشان كده قررت إني أكمل تعليمي وأدخل المدرسة الإعدادية، لأني كان معايا شهادة محو الأمية، وبالفعل دخلت ونجحت، وحصلت على المجموع ده بمجهودي لأني ما كنتش باخد دروس، وكنت بذاكر مع نفسي».
عوض: حلمي أدخل كلية الإعلام أو كلية الآداب
فرحة كبيرة انتابت «عوض» عقب نجاحه في الشهادة الإعدادية وتلقى التهنئة من جميع أهالي قريته الذين توافدوا على منزله منذ إعلان نتيجة الشهادة الإعدادية لعام 2025: «فرحتي الحقيقية هي فرحة أولادي وزوجتي بيّا، وناوي أدخل ثانوي خدمات أو منازل، وحلمي أدخل كلية الإعلام أو كلية الآداب قسم الإعلام لأني بحب الصحافة والإعلام».
قدمت زوجة «عوض» كل ما تملكه لتوفير كافة مقومات النجاح له منذ أن قرر الالتحاق بالتعليم الإعدادي: «هي اللي راحت خلصت ورق المدرسة ودفعت المصروفات وعملت كل حاجة، وأيام الامتحانات كانت بتعاملني كأني ابنها، تعمل لي ساندوتشات عشان آكلها في وقت الراحة في الامتحانات، وعمري ما هوفي حقها عليّا».
