كتبت: منة الله وليد

تحدثت الفنانة سلوى محمد علي عن تجربتها في تجسيد شخصية «عبلة» في مسلسل «فات الميعاد»، مشيرة إلى أن الدور كان من أكثر الشخصيات التي أثارت حماسها، خاصة لما تحمله من تعقيدات نفسية وإنسانية.

الأم في الماضي والحاضر

وقالت سلوي محمد علي، خلال لقائها ببرنامج «ست ستات»، المذاع على شاشة «dmc» مع الإعلامية جاسمين طه زكي: «لما اتعرض عليا دور عبلة، الست الشديدة، القاسية، الشريرة اللي مش سهلة، اتحمست جدًا، بس مكنتش متوقعة رد الفعل الكبير ده؛ لأن الناس دايمًا شايفين الأم بصورة طيبة ومثالية، لكن عبلة عكس ده تمامًا، ولأن الستات الهوانم اللي سبقونا في النوع ده من الأدوار قفلوه خلاص، كريمة مختار، وفردوس محمد، وأمينة رزق.. قدموه بأكمل صورة ممكنة».

وأضافت: «لكن الزمن اتغير، زمان كانت الأم هي الست الطيبة اللي قاعدة في البيت، دلوقتي الأم بتشتغل، بتكافح، بتحارب عشان بيتها، وهي كمان الأم والأب والصديقة، وكمان العصر ضغط على الأمهات، وضغط أكتر على الأولاد كمان، بسبب طموحنا الكبير ليهم في إننا عاوزين ولادنا يعرفوا كل حاجة وميغلطوش، بس يمكن الألطف إننا نسيبهم يعيشوا اللي بيحبوه».

وأشارت إلى أنها رأت ملامح شخصية «عبلة» في الواقع، وتحديدًا في حماة إحدى صديقاتها، قائلة: «فيه تعالٍ واضح عند بعض الأمهات، اللي شايفين إن ولادهم الذكور مش من حق حد تاني يحبهم أو ياخدهم منهم.، وفكرة إن مش أي واحدة تستاهل ابني منتشرة جدًا، وبتخلي العلاقة بين الحماة والزوجة معقدة وصعبة من الأول».

«عبلة» ليست شريرة

واختتمت سلوى محمد علي حديثها مؤكدة أن شخصية «عبلة» رغم قسوتها، إلا أنها جزء من الواقع، وتجسيدها لم يكن بهدف تقديم صورة نمطية للأم الشريرة، بل لكشف صراعات داخلية حقيقية تعيشها بعض النساء في المجتمع.

• سلوى محمد علي
• فات الميعاد
• جاسمين طه