سارة نور الشريف تتذكر والدها برسالة مؤثرة: أنت حظي الحلو.. حبيبي الأول والأخير

أحيت سارة نور الشريف ذكرى رحيل والدها العاشرة بكلمات مؤثرة، حيث نعته عبر حسابها على فيسبوك، قائلة: «وحشتني، بابي حبيبي، فات 10 سنين؟، أنا مش مصدقة، مشاعري دايمًا في اليوم ده متلخبطة وبابقى مش فاهماها، دايمًا بافتكر إن مع مرور الوقت اليوم هيعدي أسهل، بوجع أقل، بإحساس بالفقد أقل».

وأضافت: «أنت وحشتني أوي أوي، واحشني أقعد معاك، واحشني أسمع صوتك وكلامك، واحشني أشوف ابتسامتك، ابتسامتك اللي بتسبق العين قبل ما توصل للشفايف».

وأكملت: «قريت جملة في كتاب عجبتني جدًا: ماذا تفعل بفيض حب لا يبلى ولا ينتهي لشخص لم يعد هنا؟ فيض حب، بمرور الوقت لم ينقص، بل زاد وفاض حتى كاد يغرق صاحبه؟ (نوبة حراسة الأحلام)، ده أنا، ده حالي، بابص على حياتي وياك وألاقيها مش كفاية، عمر ما كان فيه كفاية في الحب، ولا كفاية في القرب.. أنا هنا، بس قلبي في زمن تاني، اتعلمت أعيش معاك وأونس قلبي بوجودك في عالم خاص بينا».

رسالة طمأنينة من سارة لوالدها

وكتبت ابنة الفنان نور الشريف: «أنت حظي الحلو في الدنيا، أنا باطمنك علينا، الحمد لله مرينا بحاجات كتير، وبفضل الله وكرمه عدينا منها، مش ناقصنا في الدنيا غير وجودك معانا.. بحبك وهافضل أحبك لآخر لحظة في عمري، وزي ما باقول لك دايمًا، أنت حبيبي، حبيبي الأول والأخير، وما بينهما.. كل سنة وأنا أقرب لك سنة».

• نور الشريف
• ذكرى وفاة نور الشريف
• سارة نور الشريف