المطرب مُسلم باكيا: أهلي سبب كل حاجة وحشة حصلت في حياتي (فيديو)
المطرب مُسلم باكيا: أهلي سبب كل حاجة وحشة حصلت في حياتي (فيديو)
أزمة كبيرة يمر بها المطرب مُسلم خلال الفترة الحالية، إذ أعلن إصابته بجلطة في الذراع ودخوله المستشفى، ليكشف بعدها بساعات قليلة انفصاله عن زوجته يارا تامر، وخرجت بعدها شقيقته في تصريحات صحفية كذبت مرضه وطلاقه، وذلك على خلفية خلاف كبير بينهما.
وقال مسلم، خلال فيديو نشره عبر انستجرام: «أنا طلقت مراتي يارا لأنها محترمتنيش في عز غيابي وعز تعبي، علشان كده طلقتها، مطلقتهاش علشان حد لأنها شاركت الناس المشاكل، والناس مالهاش غير أني بغني، مطلقتهاش بسبب أهلي ولا طلقتها علشان عايز أعمل ترند، الحمد لله أنا اتجوزت 3 مرات والـ3 مرات مرجعتهمش علشان أنا مبطلقش علشان أعمل ترند، يارا ربنا يكرمها كانت إنسانة محترمة، خدمتني في كل حاجة وكانت زوجة على أكمل وجه، وبجد أنا مشفتش منها أي حاجة وحشة، ولا شفت منها أي شيء يقل من كرامتي».
وأضاف مسلم: «سيبكم من يارا، تعالوا نتكلم عن أهلي، المثل بيقولك فيه أهل بيطلعوك، وفي أهل بينزلوك، لسوء حظي أنا أهلي مكانوش حنينين عليا، من وأنا عندي 15 سنة سبت البيت وحياتي كلها عيشتها لوحدي، إخواتي كان أول حاجة عندهم الضرب وأنا صغير، وكنت كاره حياتي وأنا معاهم، كان الجيران دايمًا بيسمعوا عياطي وأنا بتضرب، 6 أخوات كانوا عليا وأمي مكانتش قادرة تعملهم حاجة علشان والدي مش موجود».
مسلم يكشف عن هروبه من المنزل
واستكمل مسلم حديثه: «كنت دايمًا بهرب من البيت علشان أشتغل وأنجح، ويمكن الناس متصدقش، بس أنا اتمرمطت، وحياة ولادي مُسلم ومالك، الناس دي بهدلتني، -وبكى-، ومشكلة أمي إنها غصب عنها كانت بتسمع لاخواتي، ومكنتش بقدر أتكلم علشان دي أمي، ومن وقتها خدت طريق وكملت فيه لوحدي، وكنت بدعي على أهلي علشان اتذليت للناس لما سبت البيت، والكلام ده شاهد عليه ناس».
واستطرد: «اخواتي بعد ما نجحت مبيشفونيش غير فلوس حتى امبارح لما جالي جلطة في دراعي، وجريت لحقتها، طلعوا كذبوني وقالوا إني بدعي المرض في الصحافة، تخيل ده قدام الناس، ما بالك في الدرا بيعملوا ايه؟ بس أنا خلاص تعبت من كتر الضغط والشد، عندي ولدين بصرف عليهم، وعندي أقساط، وشغلي مش ماشي زي ما هو، والدنيا معايا مبقتش أحسن حال، وشغلي حاليًا متأثر علشان مبنزلش حفلات وأفراح».
واختتم: «اخواتي وأهلي سبب كل طلقاتي، بسبب تصرفاتهم الوحشة، وهما السبب في كل اللي بيحصلي في حياتي الأسرية، ويارا مقدرتش تستحمل اللي بيعملوه معاها، خاصة أنهم خاضوا في عرضها»، ووجه رسالة لأشقائه: «انتوا مش هترتاحوا غير لما تلاقوني في يوم وقعت ميت»، وأكد: «أنا طلقت يارا بسببكم، وظلمتها، ولو حد شافها وهي بتطلق ومالهاش ذنب، هتقولوا عليا إنسان كافر».
