زوجة الفنان شريف عواد تطلب الدعاء لابنتهما: «عندها نزيف في المخ ومحجوزة بالعناية»
زوجة الفنان شريف عواد تطلب الدعاء لابنتهما: «عندها نزيف في المخ ومحجوزة بالعناية»
نشرت الشاعرة بهية طلب زوجة الفنان شريف عواد، آخر تطورات الحالة الصحية لابنتهما شروق، بعد شعورها ببعض الآلام المفاجئة التي بدأت بصداع بسيط، إلا أن سرعان ما تطور الأمر ليتم نقلها إلى المستئفى من أجل إجراء الفحوصات الطبية للاطمئنان عليها، ليتضح إصابتها بنزيف في المخ.
زوجة شريف عواد تكشف تطورات الحالة الصحية لابنتها
كتبت زوجة شريف عواد عبر حسابها الشخصي على «فيسبوك» تطورات الحالة الصحية لابنتها شروق قائلة: «شروق شريف عواد ابنتي وابنة الفنان شريف عواد، كانت يوم الجمعة اللي فاتت اللي هو اليوم اللي قبل افتتاح المتحف والتنقلات داخل الجيزة صعبة، كنا كعيلة قاعدين نفكر هنتغدى إيه، وفجأة لقيتها بتصرخ أنا حاسة بصداع وعيني مش شايفة بيها، كل الحاجات اللى حواليا بعيدة، أبوها نزل وخدها بسرعة على أقرب مستشفى لينا في الهرم، قاسوا ضغطها لقوه واطي علقولها محاليل وسألوها أنت متضايقة من حاجة؟ حد مزعلك؟ ولما قالت لهم لأ، خلصت المحاليل والوضع متحسنش قالولها روحي نامي».
زوجة شريف عواد: بنتي عندها نزيف في المخ
تابعت «بهية»: «أبوها قلق خدها وداها طوارئ في مستشفى في العجوزة سألوها نفس الأسئلة، ولما قالت لهم لأ قالولها أنت بتدلعي روحي نامي من غير ما حتى يقيسولها الضغط، واحنا تقريبا صدقنا وخدناها تنام، صحيت الصبح تاني يوم في حالة أسوأ، الصداع مخلصش وحركتها بقت صعبة، ومش مدركة للمسافات، أبوها خدها وداها مستشفى ثالثة أصر يعملها رسم مخ، فعملولها أشعة مقطعية على المخ، واكتشفوا إن عندها نزيف في المخ، وإنها مش بتدلع، وحاجزينها بقالهم أسبوع في العناية المركزة لمحاصرة النزيف».
زوجة شريف عواد تطلب الدعاء لابنتها
اختتمت زوجة شريف عواد منشورها قائلة: «المحزن إن الدكاترة بيتعاملوا مع الشباب في السن ده إنهم بيتدلعوا، واحنا كأهل لو كنا فضلنا مصدقين الدكاترة وممشيناش ورا خوفنا على ولادنا، الله أعلم كان هيجرا إيه أسوأ من كده، أنا قلقانه على بنتي أوي، وهي خايفة عليا إني مش ماشية فى مشوار علاجي من السرطان، وأنا مش شايفة أي أهمية لحياتي إلا عشان شروق، هي دايرة مش عارفة هتخلص إمتى، ربنا وحده اللي هيحلها.. دعواتكم».
