جومانا مراد: أحضر لمفاجأة سينمائية قريبا.. وأحلم بتجسيد شخصية شجرة الدر
جومانا مراد: أحضر لمفاجأة سينمائية قريبا.. وأحلم بتجسيد شخصية شجرة الدر
قالت الفنانة جومانا مراد إنها سعيدة بمشاركتها في فعاليات الدورة الـ46 من مهرجان القاهرة السينمائي الدولي، مؤكدة أنها تحضّر لمفاجأة سينمائية كبيرة خلال الفترة المقبلة.
افتتاح مهرجان القاهرة السينمائي
وقالت جومانا مراد على هامش افتتاح مهرجان القاهرة السينمائي الدولي، وتعرضه قناة DMC «عندي مفاجأة سينمائية كبيرة، بس مش هقدر أتكلم عنها دلوقتي، بحب أستنى لحد ما المشروع يكتمل قبل ما أعلنه، يمكن عشان بخاف من الحسد شوية»، مضيفة «بحب أداري على شمعة حياتي لحد ما تنوّر».
وكشفت الفنانة عن أعمالها الجديدة قائلة: «عندي مسلسل تليفزيوني بعنوان خلايا رمادية مكون من 15 حلقة لرمضان، من تأليف مريم نعوم، وإخراج سعد هنداوي، وكمان عندي مسرحية جديدة هتتعرض قريبا».
وعن طبيعة الأدوار التي تجذبها، أوضحت جومانا: «الورق اللي بيستفزني هو اللي بيحرك حاجة جوايا، لازم يكون جديد عليّ، فيه مشاعر مختلفة أو فكرة إنسانية تلمسني».
جومانا مراد: لسه عندي أحلام كتير
وأضافت: «رغم كل المشوار اللي قطعته، لسه بقول لنفسي أنا ما عملتش كل اللي نفسي فيه، لسه عندي أحلام كتير وأدوار كتير نفسي أجربها، خصوصاً الأدوار الإنسانية، وكمان نفسي أعمل كوميديا، وبالتأكيد حلمي الكبير هو تقديم عمل تاريخي، وبالأخص شخصية شجرة الدر، بلغة عربية فصحى».
وتابعت: «بحب اللغة العربية جداً، وبعرف أتكلمها بطريقة خفيفة على الأذن، مش تقيلة على المشاهد، لأنها لغة جميلة وليها وقع خاص».
واستعادت جومانا ذكريات بدايتها مع الفن قائلة: «من وأنا طفلة عندي 4 أو 5 سنين كنت بحب السينما، رغم إني مش فاكرة أول فيلم شوفته، لكن السينما كانت وما زالت عشقي الأول، ويمكن ده الإحساس اللي بيجمع كل الفنانين الحقيقيين».
