ياسمين عبد العزيز عن فترة مرضها: «شوفت الموت ورجعت»
ياسمين عبد العزيز عن فترة مرضها: «شوفت الموت ورجعت»
قالت الفنانة ياسمين عبد العزيز إنها أصبحت أفضل بعد الأزمات التي تعرضت لها خلال الفترة الماضية من حياتها، وذلك لأنها أصبحت تحب نفسها وتعطيها اهتمامًا أكثر من السابق.
وأضافت ياسمين عبد العزيز خلال حلولها ضيفة على برنامج «معكم منى الشاذلي»، مساء أمس الخميس، المذاع عبر شاشة ON مع الإعلامية منى الشاذلي: «بقيت أنانية شوية لنفسي، كنت بادي كل اللي حواليا ما عدا أنا، فأنا خلاص كفاية وبقيت أحب ياسمين شوية».
ولفتت إلى أنها مرت بمرحلة عدم اتزان في حياتها، وفي تلك الفترة ظهرت في أحد البرامج التليفزيونية، التي كان يتطلب وقتها أن تمنح نفسها مزيدًا من الوقت حتى تظهر في مثل هذا اللقاء وتستطيع التحدث، مضيفة: «لأن الواحد وهو جوه الموضوع بيبقى غير براه، مابتبقيش شايفة وانتي جوه الحاجة بتبقي في الدوامة».
وتابعت ياسمين: «ماينفعش حد ياخد قرارات وهو جوه الحاجة، حتى في الطلاق مش لازم تدخلي علاقة بعد الطلاق على طول، حتى لو أنتي طالبة الطلاق فهو مش حاجة سهلة، وبيحصل عدم توازن لأي حد بيتطلق، فلازم الواحد يهدى ويرتب دماغه»، متابعة: «أنا في وقت ماكنتش حاسباها صح، واتكلمت في حاجات كتير مش صح، وغلطت، ولما أقول غلطت مش معناها إني ضعيفة».
واستطردت: «الحاجات اللي مريت بيها في حياتي أي حد مكاني كان ممكن ينهار.. حروب، أذية، طلاقات، كنت في المستشفى 4 شهور ونص، شوفت الموت ورجعت.. كل واحد بيشوف مشكلته كبيرة، لكن في الآخر القوي هو اللي بيكمل».
كما أشارت إلى أنها استمدت قوتها لتخطي أزمات حياتها الأخيرة من الله عز وجل، مؤكدة أن صاحب الفضل الوحيد في حياتها هو الله سبحانه وتعالى، مردفة: «لما بتقربي من ربنا بيطلعك من أي حاجة، والفترة دي ماقعدتش كتير، ربنا بيحبني».
واستكملت: «في سنين من عمري ضيعتها، بسبب إني كنت خايفة الناس تشمت فيا، واكتشفت بعد كده أنه طب ما يشمتوا، أقعد أنا في حياة مش مبسوطة فيها علشان الناس هتشمت؟! ما يشمتوا، في الآخر أنا اللي مش مبسوطة، محدش قاعد مكاني»، مؤكدة أن تلك النظرة هي من بين الأشياء التي غيرتها في حياتها مؤخرًا، مؤكدة أن أهم شيء لديها في الوقت الحالي هو أن تصبح سعيدة.
وفي سياق آخر قالت: «مش هينفع تكبري وتنجحي من غير ما يكون ليكي أعداء»، مشيرة إلى أن الزواج والطلاق ليس حكرًا على الوسط الفني فقط، وإنما يحدث في كل مكان، مضيفة «إحنا عندنا نسبة طلاق كبيرة جدًا في الوطن العربي».
وعن أسباب حديث الناس عن طلاق الفنانين، قالت: «أي حاجة بتظهر للناس مفيهاش بركة، وأنا لو هتجوز في يوم من الأيام مش هظهر الكلام ده، أنا عايزة أعيش حياة مستقرة بعيدة عن الأضواء»، موضحة أن معنى كلامها لا يعني أنها ستتزوج في السر، لكنها ستحافظ على خصوصية حياتها.
