ابنة الماكير محمد عبدالحميد ترثية بكلمات مؤثرة: مش عارفة هكمل حياتي إزاي بعدك
ابنة الماكير محمد عبدالحميد ترثية بكلمات مؤثرة: مش عارفة هكمل حياتي إزاي بعدك
رثت خبيرة التجميل آية عبد الحميد والدها الماكير الراحل محمد عبد الحميد، والذي رحل عن عالمنا منذ أيام بعد صراع مع المرض وتدهور حالته الصحية.
ورثت والدها الراحل محمد عبد الحميد عبر حسابها الرسمي بموقع تبادل الفيديوهات والصور إنستجرام قائلة: هتفضل في قلبي وفي روحي طول العمر، وهفضل أعيش بحسك، سندي وضهري وصاحب عمري كله بقى في مكان أحسن، والحمد لله خف من كل حاجة كانت واجعاه، وعشان كده أنا صابرة وراضية والله الحمد لله، هعيش على كل ذكرى سيبتهالي وكل ضحكة ضحكناها مع بعض، كل الليالي اللي كنا بنسهر فيها مع بعض ونرغي ونغني مع بعض ونتمتع بأي فن نتفرج عليه ونتناقش فيه وتشتكيلي من همّك وتقولي برتاح دايمًا في الكلام معاكي.
وأضافت قائلة: شكرًا على كمية الدعم وكل حاجة علمتهالي بكل حب، ربنا يقدرني ويقويني إني أكون البنت الصالحة اللي تشيل اسمك وتخليك دايمًا فخور، وأنا عند وعدي يا بابا، أنا هخليك دايمًا فخور بيا، سيرتك واسمك كبار قوي يا حبيبي، وأتمنى إنك شفت قد إيه ناس بتحبك وبتدعيلك، مش عارفة هكمل حياتي إزاي من بعدك، بس أنا عمري ما أتمنالك غير الراحة، وأنا متأكدة وكلي يقين إنك متجمع مع حبايبك وأهلك في الجنة ونعيمها، ولحد ما أشوفك تاني، بحبك حب محدش يستوعبه.
