الكفيف فى يوم «العصا البيضاء»: إما ينضرب أو يتسرق

09:27 م | السبت 17 أكتوبر 2015

العالم برمته يحتفل، يأتيه الخامس عشر من أكتوبر، فيرفع «العصا البيضاء»، فى إشارة إلى المكفوفين، تتفانى كل دولة لتقديم المزيد من الخدمات لمكفوفيها، أبوظبى طبعت إصدارات خاصة بلغة برايل، فيما قدمت الإمارات عملات صديقة للمكفوفين إمعاناً فى مساعدتهم، لكن الحال ليس كذلك فى مصر، مر اليوم كغيره من الأيام اللهم إلا مسيرة للمكفوفين فى السويس قبيل اليومى العالمى بيومين، واحتفالية أخرى فى جامعة المنصورة، عقب اليوم الرسمى بستة أيام يجرى خلالها استضافة طلبة مدرسة النور وجمعية النور والأمل، وطلاب الجامعة من المكفوفين ضمن حفل ترفيهى يشمل الكشف على عدد من الأطفال ضعاف البصر لدراسة إجراء عمليات جراحية لهم. {left_qoute_1}

يتأمل أحمد رحمة هذا كله بابتسامة متعجبة «وبعدين؟» يرى الفائدة الوحيدة من كل هذا هى الجراحات التى ينوون إجراءها للأطفال ضعاف البصر «غير كده اليوم بيعدى زى غيره» الشاب الذى يدرس بعامه الأخير فى كلية الإعلام جامعة القاهرة، يملك صورة كاملة عن حياة الكفيف فى مصر «هو اسمه اليوم العالمى للعصا البيضاء، ودى كانت بتتقدم زمان مجاناً للمكفوفين، دلوقتى عشان نوصلها بناخدها أغلى من تمنها بكتير، أقل نوع بـ150 جنيه، ودى الصينى، أما الكندى بقى فأسعارها فوق أوى، أصحابى كتير جابوها واتسرقت منهم» قصص عديدة يحفظها «أحمد» عن ظهر قلب لأصدقاء له فقدوا عصاهم البيضاء، «مش أى حد يقدر يمسك عصاية، محتاجة تدريبات مكثفة، وإحنا هنا لا فى تدريب ولا فى عصاية».. صدَّق «أحمد» المسئولين واعتقد أن اجتهاده فى استخراج كارنيه خاص سيوفر عليه ثمن المواصلات، لكن هذا لم يحدث «المفروض إنه كارنيه مجانى ليا وللمرافق، لكن ناس كتير بترفض وبيدفعونى التذكرة أو نصها.

الشاب القاطن فى الزقازيق، يرغب فى إنهاء تكليفاته الجامعية كأى طالب آخر، لكن إمكانات المدينة الجامعية لا توفر له ذلك «مش مرتاح فيها خالص، باضطر أروح، الأوتوبيسات بتنزلنى فى أماكن ماعرفهاش وبتوه، والقطر هو الحل الوحيد ليا» لكن هذه الوسيلة أيضاً غير مريحة بالمرة له ولأقرانه، حيث يتعرض فيها للضرب عادة «ياه دانا على طول بانضرب، ساعات بالإيد وساعات باللسان، الناس مبتبقاش شايفة قدامها وبيتدافعوا عشان يركبوا، محدش بياخد باله اللى قدامه كفيف أو لأ.