أعربت الفنانة الشابة ياسمينا العبد، عن سعادتها البالغة بالنجاح الكبير الذي حققه مسلسل «ميدترم» الذي انتهى عرضه مؤخرًا، إذ وجهت الشكر إلى الشركة المتحدة للخدمات الإعلامية، على منحها هذه الفرصة، قائلة: «بشكر المتحدة على الفرصة دي، وعلى ثقتهم فيّ.. شكرًا للأستاذ أحمد فايق، عبد الله غلوش، وأحمد شفيق على الدعم.. ويا رب اللي جاي يبقى أكبر وأحلى كمان».

وكتبت ياسمينا العبد، عبر حسابها على «انستقرام» رسالة مطوّلة تُعبر من خلالها حجم ارتباطها الشديد بتلك التجربة الدرامية، والتي تُعد الأقرب لقلبها، إذ قالت: «أنا كنت متأخرة في البوست ده لأني حقيقي مش عارفة أعبّر عن مشاعري بعد نهاية المسلسل.. مش عارفة أقول إيه ولا أشكركم إزاي.. المسلسل ده أقرب حاجة عملتها لقلبي».

ياسمينا العبد: لم أتوقع أن يتجاوز عدد مشاهدات «ميدترم» المليار

وأضافت «أنا بجد مش قادرة أوصف التعب والمجهود اللي اتبذل من أكبر شخص لأصغر شخص، اللي ورا الكاميرا قبل اللي قدام الكاميرا.. بس الحقيقة إن كل شخص اشتغل في المشروع ده كان جزء أساسي من نجاحه. وإحنا بنقرأ وبنحضّر عمرنا ما كنا نتخيل إننا نوصل للتوب 1 على شاهد وWatch It، ولا إننا نوصل لمليار مشاهدة. يعني إيه الرقم ده أصلًا ؟».

مريم الباجوري من أهم المخرجين حاليًا

وكشفت المشاعر التي كانت تُسيطر عليها مع بديات العمل على المسلسل، قائلة: «كنت خايفة جدًا وأنا بشتغل على المشروع ده لأني ما كنتش عارفة هل هكون قد التحدي ولا لأ، لولا الأستاذة مريم الباجوري، واحدة من أهم المخرجين دلوقتي، ما كانش هيبقى فيه مسلسل أصلاً.. بشكرك على ثقتك فيّ وثقتك في الشباب، وبنشكرك على العظمة اللي أنت فيها. أنا فخورة إني كنت جزء من أول عمل درامي ليكي. بحبك جدًا جدًا جدًا».

واستكملت رسالتها، «كل النجوم اللي كان ليا الشرف إني أشتغل معاهم، شكرًا على شغلكم اللي فوق العظمة. إنتوا كسّرتوا الدنيا.. عمري ما اشتغلت مع ناس مليانة بالشغف بالشكل ده والكيميا اللي كانت بينا كانت توفيق كبير من ربنا.. أنتم عيلة حقيقية بجد.. بشكر وزارة التعليم العالي على الدعم والتركيز العظيم، شكرًا إنكم مؤمنين بطاقة الشباب وبمشاكلنا.. بشكر الأستاذ محمد صادق وورشة براح على الورق اللي شفنا نفسنا فيه».

ياسمينا العبد لـ«جيل زد»: صوتكم مسموع وتحدياتكم متقدّرة

وحرصت على توجيه الشكر إلى جمهورها الذي دعمها في تلك التجربة، بقولها: أهم شكر في الدنيا كلها.. إنتم.. شكرًا ليكم إنتم على كمية الحب اللي أنا لحد النهارده مش قادرة أستوعبها.. اندمجتوا في القصة بشكل عمري ما شوفته في حياتي، وتقريبًا عمري ما هشوفه. المشروع ده ليكم. صوتكم مسموع وتحدياتكم متقدّرة.. اللي بيطلع من القلب بيروح للقلب.. شكرًا من هنا لبُكرة».

• ياسمينا العبد
• ميدترم
• جيل زد
• الشركة المتحدة للخدمات الإعلامية