صوته يلمس القلوب بصدق.. برنامج دولة التلاوة يحتفي بالشيخ أحمد الرزيقى
صوته يلمس القلوب بصدق.. برنامج دولة التلاوة يحتفي بالشيخ أحمد الرزيقى
احتفى برنامج دولة التلاوة بالشيخ أحمد الرزيقي، أحد أساتذة دولة التلاوة المصرية، في تقرير صوتي مُميز بصوت الفنانة والإعلامية الكبيرة إسعاد يونس، مدرسة تدرس لكل واحد عايز يتعلم التلاوة كما ينبغي.
تفاصيل من حياة الشيخ
واستعرض التقرير تفاصيل من حياة الشيخ وكيفية حفظ القرآن الكريم مبكرا وانتشر صوته بشكل كبير في كافة ربوع العالم، صوت بيكسر الصمت كأنه نسمة فجر بتلمس القلوب بصدق، حيث ولد عام 1938 في قرية الرزيقات مركز أرمنت غرب الأقصر، ومن يومها والدنيا كانت تستعد لحكاية مختلفة، حكاية صوت هيبقى من أنقى الأصوات.
أهل قريته قاعدين حولين راديو قديم بيسمعوا
«في سنة 1950 كان بيشوف أهل قريته قاعدين حولين راديو قديم بيسمعوا الشيخ عبد الباسط عبد الصمد، والعيون كلها فخر، والقلوب كلها حب، واللحظة دي كانت علامة فتحت في قلبه باب جديد، وقرر يسيب المدرسة شوقا للقرآن ورغبة في أن يكون في يوم من الأيام هو كمان مصدر فخر لبلده، وراح على كتاب القرية وبدأ يحفظ ويجود ويعافر، وكان بيقلد كبار القراء يجيب زجاجة لمبة الجاز يحطها على بقه كأنها ميكروفون ويقرأ كأن الدنيا كلها بتسمعه، وسنة ورى سنة يكبر بصوته وقلبه لحد ما في سنة 1974 دخل الإذاعة وبدأ اسمه يتردد على كل لسان في كل مكان في مصر يتقال دا صوت الشيخ أحمد الرزيقي».
