بيتر ميمي يشكر أبطال مسلسله: «مفيش غير مصر اللي تعمل صحاب الأرض»
بيتر ميمي يشكر أبطال مسلسله: «مفيش غير مصر اللي تعمل صحاب الأرض»
كتبت: سارة طارق
وجه المخرج بيتر ميمي رسالة شكر وعرفان إلى جميع العاملين في مسلسل صحاب الأرض، والذي تمّ عرضه خلال الماراثون الرمضاني الحالي، وذلك من خلال صفحته الرسمية عبر موقع التواصل الاجتماعي فيس بوك.
بيتر ميمي يعبر عن فخره بالمشاركة في مسلسل صحاب الأرض
وعبّر المخرج بيتر ميمي من خلال رسالته عن امتنانه وشكره لجميع من اشترك في إخراج مسلسل صحاب الأرض بهذا الشكل، إذ قال: «لم ينته القصف.. لن تنتهي الحياة… فخور إني كنت جزء من العمل ده اللي بيوثق، ليس الحرب والإبادة فقط، لكنه يوثق الأمل والقوة والصمود.. أشكر كل حد اسم اسم وعامل عامل، شكرًا على الاحتمال وعصبيتي المستمرة على مدار التصوير».
وتابع: «شكرا على الاحتمال وعدم التذمر بالرغم من صعوبة العمل، شكرًا على إيمانكم اللي كان بيخلينا نكمل، شكرا إن كل فرد من أول البطلة والبطل وكل العناصر كانوا بيسندوا بعض مفيش نجم ومش نجم، مفيش ممثل أو عنصر بيفكر في نفسه لكن بيفكر في العمل والقضية وإنه يلمس الناس في الوطن العربي والعالم كله، شكرا كل من أصيب في أثناء العمل ده بسبب الركام أو كسر الزجاج أو غيره، لأن الناس الحقيقيين مش بس بيتخدشوا زينا دول ربنا يكون في عونهم ويحميهم ويديهم قوة من عنده، ويرجع حقهم ويديهم رجاء من عنده».
بيتر ميمي: شكرًا من قلبي لبلدي مصر ورئيس مصر
واستكمل: «شكرا منه شلبي، وإياد نصار، وعصام السقا، وطارق نور، وأحمد طارق، ودينا كُريم، وحسين عسر، وهاني عبدالله، ودينا نديم، وخيري سالم، وأحمد حمدي، وأمين بو حافة، ومحمد طنطاوي ورجالته، وهاني عبدالله ورجالته، محمد جمال وأحمد يسري، وليد خيري، حسن حجازي، وإبراهيم فرج، ومادونا عدلي، وبندق ورضوان ورينا وإبراهيم أشرف والمهندس محمد أمين والمهندس أحمد زهران والمهندس محمد الدالي والمهندس طارق علوش وعمرو علوش ومروان وشوقي وبسيوني وزياد ومحمود ويوسف وكشكوش وسامي ورجالته ومسعد خميس، وأحمد عبدالظاهر وحمادة وكشري ورجالتهم، ومحمود علي، شكرًا الأستاذ كامل الباشا والعالمي آدم بكري وسارة يوسف وتارا عبود وروان الغابة وكيرا يغنم وإياد حوراني».
واختتم منشوره قائلًا: «شكرا لكل واحد بعتلي في أثناء التصوير شد حيلك وكان داعم.. شكرًا لأهلي اللي دعواتهم سندهم كان معايا.. شكرا للقريبين مني اللي كانوا سند.. شكرا للشركة المتحدة.. شكرًا من قلبي لبلدي مصر ورئيس مصر.. ما هو مفيش غير مصر تقدر تعمل مسلسل زي ده.. وفي النهاية شكرًا لأصحاب الأرض منكم نتعلم الصمود والاحتمال».
