الجري في المكان

بتنسى وسط الجري..

بشر كتير وقلوب..

والباقي من يومك.. بيكفي بس يادوب..

تبص لمرايتك.. وتشوف في كام شعرة

من راسك أبيضت..

والزحمة بتخليك.. تنسى الصحاب عادي..

مبقتش حمل عتاب.. ولا أي كلمة لوم..

ويوماتي بتفارق.. في الدنيا شخص جديد

ويوماتي بتقطّع..

كام صورة م الألبوم..

بتقيس نجاح اليوم..

بكتر شرب الشاي وكتر وقت الشغل..

وقلة ساعات النوم..

معرفش ليه عايش..

الدنيا جري في جري..

قلم رصاص يفنيه..

قصفه وكتر البري..

معرفش ليه مكشّر..

وواخدها جد في جد..

بتخاف أوي لـ تتساب..

فتخاف تعاشر حد..

وتخاف تحب عشان..

قسوة برود الرد..

وتخاف يعدي العمر..

تطلع شموس وتغيب

حاطط إيديك ع الخد..

تحلم.. ومابتقدرش..

دق الساعات حواليك.. بيوترك أكتر..

فتسرّع الخطوة.. علشان ما تتأخرش..

والجري بيخليك..

صدرك يضيق.. تنهج..

مين اللي قال الوصول..

روشتة محفوظة أو وصفة في الكتالوج..

أو جزء من منهج؟

• شريف حسين
• القصيدة
• محمد إبراهيم
• شريف حسين
• القصيدة
• محمد إبراهيم
• شريف حسين
• القصيدة
• محمد إبراهيم
• شريف حسين
• القصيدة
• محمد إبراهيم