إهداء مكتوب .. لصحاب الحلم
مواليد توقيت العوم في البحر
تحت المطرة مش تحت الشمس
الناس اللي مفيش جواهم ولا عُقدة نقص
أولاد الإيه..!
اللي بيستقتلوا على بُكرا اللي مايعرفوهوش
إهداء مفروش في طريق الحظ اللي معاند
بنشارة ورد
يتعاملوا مع الحاصل كُلُّه
وكإن الموجود فزُّورة
برّا الصورة
لكن برضُه
هُمَّ البرواز اللي مخلّي العين بتشوفها
إهداء مكتوب في قصيدة حزن
لضحكة طفل
الكلمة اللي تحلّي لسانك أول ما بتنطق بحروفها
إهداء للغلبان في الشارع
القاعد على باب الجامع
العايش على لقمة بتطلع من جيب مش محتاجها ف حاجة
إهداء للحاجة وطول الصبر
للعاشق وقت ما يلقى حبيبه ف وقت ما كان هيموت م الخوف
من فكرة شبت .. وفاتني القطر
إهداء للبردان م الوحدة المتغطي بستر الليل ع الدمع
لوحشتيني .. ومبوحشكيش؟!
إهداء لمفيش اللي بتتقال دايما معناها إن أنا مجروح
إعمل ما أخدتش بالك لما أقول عن جرحك موجعنيش!
خلص الإهداء .. من غير إمضاء ممن أهداه
شكرا على حُسن قرايتك ليه .. ممكن تنساه؟!