«فكرة» راديو كلية الطب

09:44 م | السبت 19 ديسمبر 2015

«رايح فين؟ أكيد نازل عالقهوة» كلمات تحمل لهجة استنكار تتردد على مسامع الشباب من الآباء، فدائماً ما تُعرف قَعدة الكافيهات بأنها مضيعة للوقت وتسلية لفراغه. ولكن أحياناً يختلف الأمر مثلما حدث مع فريق «فكرة» بكلية الطب جامعة عين شمس الذين حولوا جلستهم من جلسة فضفضة إلى مشروع عمل أثناء جلوسهم على أحد الكافيهات.

«إحنا حالياً شغالين على راديو للأسرة» دور شرحته آية حازم، قائدة فريق مشروع الراديو، وقالت «طبعاً أسرة فكرة معروفة فى كلية الطب وليها أنشطة كتيرة، بس بره مجال الكلية مش معروفين أوى، فالراديو ده هيكون هو وسيلة التواصل مع الطلبة جوا الكلية وبراها كمان، خصوصاً أن شباب كتير مهتمين بالإذاعة سواء كوسيلة للترفيه أو حابين يجربوا الشغل فيها سواء كإعداد أو كمذيعين».

وأضافت «آية» قائلة «حلمنا بعد ما نوصل لعدد كبير من الناس أننا ننقل برامجنا من على الـSound cloud والـSocial media أنها تكون مذاعة عالهوا.. بس حالياً إحنا مركزين عالبداية اللى هتكون بإذن الله يوم 28 نوفمبر».

والتقط منها «خالد بط» أطراف الحديث وقال «المواضيع اللى هنقدمها هتكون فى برنامجين وبنناقش فكرة إضافة برنامج تالت. أول برنامج هيكون عن قصص النجاح لناس قدرت تتحدى ظروف صعبة وتنجح فى مجال هى حباه، وبرنامج عن تخصصات كلية الطب وحكايات نواب وطلبة ماجستير عشان يساعد الطلبة الصغيرين ويؤهلهم للسنين الجاية. أما البرنامج التالت ممكن يكون عن أحدث الأبحاث والتجارب اللى فى مجالات الطب المختلفة».

واستكمل «خالد» حديثه «شعار الراديو هيكون (وشّة تفيد)عشان إحنا بنحاول زى ما أننا نسلى وقت الناس أو نقدم لهم حاجة تعجبهم، بنحاول كمان نفيدهم ونضيفلهم حاجات جديدة».

أما «رؤى مجدى» فترى أن قوة البرامج فى تنوع أفكارها ومرونة فريق الإعداد حيث قالت «الناس ممكن تتشد للبرامج من خلال اللى بنقدمه وممكن يرضى أذواقهم المختلفة، يعنى برنامج قصص النجاح ده هيكون ميال لشباب كتير مهما كانت مجالاتهم، والبرنامجين التانيين مرتبطين شوية بدراستنا عشان التواصل مع شباب كليتنا، وطبعاً اللى هيخلينا ننتشر هو أننا نبدأ ننوع، يعنى ممكن بعد فترة نعمل برنامج توعية صحية مبسطة مثلاً، وطبعاً فى البداية بتاعتنا حالياً، هنعتمد على Social media بمساعدة طلبة كليتنا».