مش كل الـ معلش تراضي
وتطيّب خاطر وجع القلب
مش كل طريق ينفع تمشيه
تزهق فتقوم تركن على جنب
قبل ما تختار تسكن إنسان
خليك إنسان
أرجوك لو آمن ليك، تفضل
بتحافظ على أنه مايندمش
علشان ماتقولش:
بكرا هينسى
القُرب ساعات بيكون فرصة
مش هتعوضها ف يوم ما تضيع
والناس الغالية.. بأي تمن..
هتكون خسران لو قُلت تبيع
وإن يوم حبيت
خليك مجنون..
وإن كل الناس حواليك عاقلين
الناس عايشين
بيعيدوا الأحداث بالكامل..
ويقولوا روتين!
أُسجد لله.. وادعيه تفرح
من غير ما تدوس على فرحة حد
وإن كان لك صاحب كون صاحب
اتنين ماضيين على نفس العقد
ونصيحة بجد:
ارجع بيتك.. وف إيدك ورد
أنا أعرف ناس مابيبتسموش غير للأغراب
أو للأصحاب
أو للبنت اللي البصة ف قلب عيونها حرام
أنا أعرف بنت يوماتي تنام
وعيونها بتنزف نفس الدمع..
على نفس الخد!
والبس من كل هدوم الناس..
اللي يليق لك
مش يعجبهم!
أنا آسف فعلا لكن قول: طُظ ف ذوقهم
لو كان هيخليك مش مرتاح!
في الدنيا براح على قد عينيك
بس إنت تشوف
علشان ماتخافش.. عليك تقتل أسباب الخوف
زي إنك تحلم حلم بعيد وتكون مستعجل توصل له
زي إنك تعشق مثلا حد ف يوم علشان عاجبك شكله
زي إنك تغلط وتصاحب واحد خاين..
وإن خانك تفضل تآمن له!
علشان ماتخافش..
ماتباتش ف يوم عامل حاجة..
تخليك مُجبر تنطق: "معلش"!