مالوش رجلين
الكدب بسيط، ونبيه، وعبيط..
بيخلي السائل.. صاحب بيت ...
والبيت فيه مال، وحرام ، وحلال..
وولية عجوزة، وست عيال ...
محمود سرّيح.. وفقير، وصريح..
بتغازل روحه الريشة الريح ...
وحسين درويش.. له شعر كنيش..
بيقولك فيه.. وتلاقي مفيش ...
وأمين عطّار .. وضليع في الكار..
بيبع الفول.. على إنه فشار ...
والست آمال.. عندها خلخال..
بتبيعه عشان.. ما يميل الحال ...
والحاج عويس.. بيّاع كراريس..
شايب بيقول.. على نفسه عريس ...
وبهيّة يادوب.. قالت هتتوب..
حدفوها بطوب.. و قالولها تهيص ...
الكدب إن كان مالوش رجلين ...
له ودن وإيد ولسان وعينين ....
له ألف طريقة وألف طريق..
بس إنتوا إختاروا هتمشوا منين.
