هيَّ لحظة
هيَّ لحظة ..
لحظة واحدة تشِد عقلك من جدوُره
ينطفي في القلب نورُه
الجناح يتحدى سورُه .. وتبقى حُر
اسأل البنت اللي قالت ألف مرة
ضِل حيطة
وأشتري أب لعيالي
لاجل شهد مليش نصيب جُوّاه بدوق م الدنيا مُرْ
واسأل الدمعة اللي نزلت فوق خدودها
بعد كلمة : "انتي طالق"
خط سير قطر الحياة اللي بتركبه: للخلف دُر
لحظة فيها الست قالت: عيشتُه فعلا مستحيلة
لحظة فيها عينيها شافت بيتُه سجن:
بناقصه حتى .. لو باني لُه حيطان جميلة
لحظة واحدة تخلّي واحدة
مش باقي لها إلا حتة لحمة حمرا
بذرة بُكرا مسيرها تطرح من وجعها
للي من غير عيلة .. عيلة
ست قالت للي مد إيديه عليها :
قولي ليه هستأمنك على ستر لحمي؟!
ست شايلة بنتها وماشية فـ شوارع
خلقها أنيابها أرحم
م اللي كان مفروض بيحمي!
هي لحظة .. تمنعك إنك تفكر
قلبك المطعون يقرر
الطاعون بيمد نفسه فـ توب عروقك
الشيطان يركب هدوءك
ترفض الواقع بحالُه
وتبقى أنت .. أنت بس
زي لحظة ..
لحظة فاقت كل حِسْ
قُمت فيها قلعت بدلة
سبتها على مكتبك جنب استقالتك
قبلها لو جيت تفكر في ارتباطك
واحتياجك للمرتب كان قرارك يبقى غيرْه
لحظة فيها بتبقى واحد
مش مسامح في اللي شافُه
حد فتّح عينُه فجأة فـ وش كل سطور مصيرُه
لحظة فيها بتهدم المعبد بحالُه ..
فوق مكانك!
طُظ في روتين الملامح
طُظ في لباقة لسانك
طظ لو تحقيق إداري م اللي فوق منك أدانك
اللي فوق منك ساعتها مش هيبقى لسه فوق
مش ساعتها هتبقى عايش دنيتك من غير حبيبه ؟
تبقى مُتْ
واللي ميّت مش بيبقى فوقُه فوق
زي لحظة ..
معظم الستات عاشوها
واحدة ماشية على الرصيف واحد عاكسها
عينُه حفظت كل تفاصيلها ولسانُه
بالكلام واخد مقاسها
مدّت الخطوة اللي ناقص تبقى جَرية
واللي فاضل للّي حاصل
سوق نخاسة وتبقى فيه البنت جارية
حط جسمُه عليها حسّت ..
دمها اتجمد في روحها
والدموع بالعكس نازلة بين عروق الدم سارية
تنتفض لُه البنت تنسى
كل شئ خلاها أنثى
وتضربه على راس رجولته يقوم مصرخ
تمشي حاسة إن فيها حاجه ناقصة
والعيون الباصّة نجسة
كل مابتلمس توسخ!
واللي فارق بين ماحدش حس بيها
وباللي بيها
وحد بيشاور على اللي حصل معاها
وحد بيشاور عليها
هي لحظة ..
همزه تحت ألف "اهانة"
انتفاخ بطن المثانة
وانتظار دورك عشان تدخل تفضّي
انفجار عُمرك في راسك
أرنبة حامل بتولد شعر فضي
والحياة عماله تدّي فوق دماغك
هي دي اللحظة اللي فيها
أنت بتقرر تسيب دايرة حياتك
دنيتك تحصد نباتك
تجرف الأرض اللي طرحت تبقى بور
إيه اللي هيبقّيك عليها
وأنت فيها
كنت شجرة أرضها من جذور ؟!
