يا مولودين بالصبر والدمعة..
العتمة سبقتنا قدنا شمسنا شمعة..
قلبي انكسر مـ الريح سند عـ الريح..
البحر جرح في أرض واشمعنى بحري جريح..
..
يشلب في ملح ونوارس يبكي عـ الغايب..
يبكي بُكا المولود والعاشق الدايب..
قلبي يا تمرة شقى متعلقة في عودي..
تنده حبيبتي اقطفيني وهي مش سامعة..
..
بحر النوارس يا حارس للصدى والصد..
البحر كاتب رسائل منتظر للرد..
قلقان قليبك يا عاشق ما بينها جزر ومد..
يا بحر يا مونسينك كل اللي وحشوني..
مش كانوا بدل النصيحة مدوا وحشوني..
غرقان بينجد غريق والعتب عـ الشوق..
من امتى ريق الأفاعي كان بيقطر شهد..
..
كل المراكب كفوف شالت حبيبنا وغاب..
من قلة السائلين.. اتلفتت لأبواب..
غشيم يا طبع المناجل تقطف رقاب لاحباب..
والبرد عاضض وحابس شمس مش طالعة..
قلبي يا تمرة شقا متعلقة في عودي..
تنده حبيبتي اقطفيني وهي مش سامعة..
...
للمركبة شطين يبادلوا الحال..
شط انتظار لوصال..
وشط بيودع بالحنين والنار..
لحظة ما بيبل ريق شط فيهم وصل..
في شط نبت مـ الحنين صبار..
يا مركبة مين علمك تمشي..
مش كنتي أولى تفضلي أشجار..
...
قلبك حبيبتي في السفر بينوح..
والبحر مالح والدمع مالح..
علشان كدا قلب السفن..
عمره في يوم ما اخضر..
يا حبيبتي قلبك خير..
والدنيا مركب شر..
والناس بتضحك كل ما طلوا لـ نوح..
بيبني مركب للنجا عـ البر..
...
وأنا خوفي مش مـ البحر..
وأنا خوفي مش مـ الموج..
أنا خوفي كان مـ القهر..
والبحر وقت الطوفان..
لا يحتمل دمعة..