مجدى عبدالرحيم.. مراتى نظارة المدام

11:10 م | الخميس 28 يناير 2016

أنا رايح المورستان على إيدين القنوات الفضائية والمدام، يا عالم يا هوه.. أنا عايز حد يكلم القنوات، لإنهم بصراحة تعبونى معاهم قوى وعملوا لى مشاكل مع المدام وزعلوا منى الأولاد. شوف يا سيدى الإعلانات المستفزة، اللى تجيب الضغط لا مؤاخذة.

إعلان يقولك:

- لو عايز تعيش فى الجنة.. وتنول كل ما تتمنى.. تعالى عندنا ماحدش زينا.. تملك فيلا فى قرية سياحية.

والمدام بتتفرج، وتبص من تحت النظارة. وتقول للعيال: - آدى الفيلات ولا بلاش مش العيشة فى إمبابة وزحمة الشوارع والدوشة ليل نهار.

وأنا مطرشق من الغيظ، لو قعدت أحوّش مرتبى بالعلاوات والبدلات لحد ما أطلع معاش وأموت مش ممكن نشترى فيلا. وإعلان تانى مستفز:

- اتصل الآن.. يصلك المنتج حيثما كنت.

يا عالم إحنا كنا زمان بنشترى من سوق الجمعة، دلوقتى بطلنا نشترى خالص مافيش نفس ولا فلوس.

إعلان تالت: - مطعم مش عارف إيه.. يقدم لك الوجبة العائلية، من الفراخ المقلية.. ثمن الوجبة مائة وخمسة وعشرون جنيهاً.

يا بلاش، ومشروب عائلى مجاناً.. شفت الكرم.

والمدام بتبص من تحت النظارة.. وتوشوش العيال والعيال تعيط: - عايزين يا بابا الوجبة العائلية.

طب أنا لو عملت سبع رجالة وكبرت فى دماغى، ورحنا المطعم، مش هدفع أقل من ربع المرتب.

إعلان رابع: - الدبدوب العجيب لطفلك الحبيب.. السعر مدهش فقط مائة وخمسون جنيهاً.

يا بلاش، والبنت الصغيرة الدلوعة شابطة فيه وعمالة تزن فى الداخلة والخارجة، وأنا صاحى وأنا نايم.

- عاوزة الدبدوب يا بابا.

وقعدت تعيط وأنا قلبى ضعيف ومش قادر يستحمل.

وحماتى الله يسامحها دخلت فى المشهد زى مارى منيب وقالت: - إزاى تكسر قلب البنت.. إيه يعنى لما تجيب لها دبدوب.

وأنا ماسك أعصابى.. المهم عملت سلفة بضمان المرتب واشتريته وبقى عندنا دبدوب.

كل اللى فات كوم وبرامج المطبخ كوم تانى، وإزاى تحمرى الديك الرومى المحشى بالمكسرات وطريقة طهى الكافيار، أكلات غريبة وإعلانات عن أدوات مطبخ وعصارات وعجانات وخلاطات. أرجو تشفير الإعلانات المستفزة.. يا عالم مش عارف أعمل إيه بالظبط؟

مش كفاية عليّا الشغل وزحمة المواصلات.. ومصاريف البيت والمدارس، وفاتورة النور والميه.. وإلخ.. ونظارة المدام.