الأخلاء.. بس بالقاف

09:59 م | الأحد 31 يناير 2016

شريف أسعد

كاتب صحفي

فى أثناء حفل توقيعى لكتابى الجديد الصادر فى معرض الكتاب قابلت على غير المعتاد ما يزيد على الخمسين طفلاً لم تتعد أعمارهم الثانية عشرة من العمر.. وبصراحة الموضوع ده سبب لى مفاجأة لم أكن أتوقعها، وخصوصاً لما وجدت وراءهم أهلهم، وهم يقسمون على أن أحافظ على هذا الجيل الذى بدأ يقرأ لأول مرة فى حياته.

مسئولية لم أكن أتوقعها، ولم تكن فى الحسبان، وبدأت فى سؤال نفسى: أنا إيه اللى بعمله ممكن يخللى الشباب ده كويس وإيه ممكن يخليه وحش؟؟؟ إيه اللى ممكن أكون بعمله عشان يأثر فى الشباب ده سلباً وإيه اللى ممكن أعمله يأثر فيهم بالإيجاب؟؟؟

أسئلة كتير جداً دارت فى دماغى من خلال تعليقات عشرات الآلاف على صفحتى، ومن خلال المواجهات المباشرة فى حفلات توقيع الكتب، التى يغزوها الأطفال، ليمنحونى شرفاً لا أستحقه.

إنما كانت دايماً الإجابة موجودة فى كلمة واحدة عمالة تنور قصاد عينى من واقع ما وصلنا إليه فى مجتمعنا الحالى.

على رأى سعيد صالح فى مدرسة المشاغبين.. الأخلاء.. بس بالقاف.. أقصد الأخلاق.

الأخلاق هى القيمة الوحيدة المتبقية للتمسك بها.. أو يا سيدى على الأقل محاولة التمسك بها عشان نحاول نبنى جيل جديد يصلح ما أفسدناه بعد إهدار العديد والعديد من القيم بمشاركتنا جميعاً ولا أستثنى منا أحداً..

إوعى حد يفهمك إن قلة الأدب وسيلة، إوعى حد يقنعك إن السفالة طريقة، إوعى حد يقول لك إن الكبت والقمع والظلم ممكن مواجهته بالانحطاط، انظروا إلى رموز التاريخ وتابعوا وشوفوا كانوا بيتصرفوا إزاى..

إوعى تقتنع إن الشباب اللى فاكر أنه بيمثل الشباب بالطريقة دى له اليد العليا.. والله العظيم مطلوب من حضرتك تنزل إلى محافظات وقرى ونجوع مصر لرؤية شباب أسمر واقف منتظرك على مداخل مدينته وقريته من الفجرية، أملاً فى أن تكلفه بأى عمل يساعد فى تغيير شكل خريطة معيشته ومعيشة أهله.

الشباب اللى بجد فى انتظار بناء البلد يا جماعة وإحنا -وأنا معاكم- عمالين نهرى بجد.

يجب أن تعلم أن نسبة خمسة وستين بالمائة من تعداد سكان مصر ممثلة فى الشباب، يعنى أكتر من خمسين مليون شاب فى مصر يحركهم الطموح ويداعبهم الأمل وتغزو عقولهم الأحلام.

لو حضرتك فاكر إن الدولة مش عارفة الكلام ده، وبتحاول تستغله فى التنمية وفاكر إنها بتبنى السجون بس تبقى بأمانة شديدة مش عاوز تسمع أو مش واصلاك معلومات كتيرة، وحتبدأ حالاً فى شتيمة كاتب المقال، والفكرة هنا مش فكرة الشتيمة على قد ما هى فكرة إنى أعرفك إن فيه شباب بيبنوا قرى فى كل أنحاء مصر، وفيه شباب شغالين على مشاريع كتيرة صغيرة، وفيه شباب لسة مستنى، إنما العامل المشترك بين كل الشباب دى.. إنهم مصممين على بناء وتنمية البلد دى.. كل حاجة حتتغير.. وحيتبقى بناء البلد.. السيسى حيمشى.. واللى بعده حيمشى.. واللى بعده.. واللى حتجيبه.. واللى حتجيبوه.. واللى حيتبقى الطوبة اللى حتبنيها والحرف اللى حتعلمه لحد.

لى صديق اسمه سامح مشالى، ثورجى من إسكندرية، كنا بنتكلم فى المحمول من يومين بعد منتصف الليل وقعدنا نتناقش كتير فى مدى أهمية الحفاظ على الأخلاق والأدب فى مواجهة أى ظلم أو قمع موجود، واختلفنا كتير جداً، لكن فى نهاية المكالمة سامح قالى بطريقة عرضية تماماً إنه مسافر هو ومجموعة من الشباب رايحين «جبل علبة» اللى فى جنوب غرب مصر على الحدود بين السودان وليبيا عشان يوزعوا مساعدات على الناس اللى ساكنة هناك.

من الإسكندرية إلى أقصى جنوب غرب مصر، شباب.. محدش طلب منهم ده.. محدش وجههم.. بيلعنوا النظام.. إنما.. بيبنوا.

أقولكم على حاجة؟؟؟ النظام موافق على الشتيمة.. فى مقابل البناء.. بس إحنا نبنى.

أصل الشتيمة «ما بتلزقش» والسفالة لا تصيب إلا صاحبها، ودى مبادئ مصر كلها اتربت عليها إنما فيه شوية دلوقتى عاملين نفسهم مش واخدين بالهم وابتدوا يسوّفوا المبررات بعد ما كانوا بيلعنوا كل مبرر.

لن تتبقى لنا إلا الأخلاق فى النهاية، حتى مش علشان نفسنا، علشان خاطر ولادنا طيب.. فبعد أن نرحل جميعاً لن يتبقى لهم منا إلا الأخلاق.. أنتم فقط من ستحددون شكل ما ستتركون من ورائكم لذرياتكم.