بحبك
بحبك
ما دام مُجبر على الكلمة لظروف الوقت
كتبت قصيدة بتأرّخ حصاد النبت
قصيدة بتبتدي تشرح مبادئ علم فن النحت
كلام موزون
ميزان حسّاس بيختصر المعاني بسَكْتْ
وحشتيني
قصيدة خوض في عَرْضْ الذكريات
تخلص بكلمة: "مُت"
بحبك زي طفل بريء بيتعلم يفُك الخط
بحبك مش في وصفك .. لأ!
قصيدة بتثبت: إن الأنبيا حبُّوا
وإن الأرض ..
لو نطقت لعطش الطفل في الصحرا
بتثبت: فكرة إن الرب كان جنبُه
بحبك .. مش مُجرّد رأي في الصورة
وفي التفاصيل
بحبك
باختصار نظرة شَرَحها الحُضن بالتفصيل
بحبك .. ليها ألف دليل
بيسكن بين مسام الروح..
ويجبر ..
حد مش شاعر يقول الشعر من قلبه!
بحبك في الحرم طوفة
بحبك طفلة مكسوفة
بحبك .. للكفيف شوفة
بتِعْجِزْ عَجْزُه وتخلّيه
يعوم بين المحيط والشط
بحبك يا اللي من حظك حبيبك يبقى ..
م النوع اللي مايحبّش يحب فـ صمت
ماتتكسفيش من الكلمة اللي بيقولها
ده حقك تزعلي منّي في حالة ..
لو ماكنتش قُلْت: "بحبك"
