يوميات مصرية جدا.. "خناقة شيرين وعمرو"

لا تنسى"التربية " قبل كل شيء و"الأدب " مطلوبين..

وليه بدأت بده أقولك..

المطربة شيرين عبدالوهاب ظهرت في "إم بي سي 2" مع وفاء الكيلاني، وقالت عن الملحن عمرو مصطفى "ملوش في المزيكا وصوته وحش وكان بيجي البروفات عشان يطبل على الجيتار مش يلحن".

طب و"عمرو" سكت.. أبدا والله، رد وقال: "افتكري ريحة رجليكي لما بهاء الدين محمد ونصر محروس اتحايلوا عليا اسمع صوتك.. وقالوا لي والنبي خدها في العربية في سكتك ونزلها مدينة نصر.. وبعدها غسلت العربية من الريحة"..

بالذمة عيب..

عيب !

طب تيجي أقولك الأحسن :في مرة عبدالحليم اختلف مع أم كلثوم.. وقال في احتفال الجيش قدام عبدالناصر: "معرفش إني لما أغني في نهاية حفل فيه أم كلثوم مقلب ولا شرف كبير!"، وأم كلثوم شافته بعدها وشدته من شعره وقالت له: "شعرك ده"..

واختلف حليم مع فريد واختلف حليم مع رشدي وخطف الأبنودي مرة.. واتخانقت وردة مع بليغ.. مسمعناش "قلة أدب".. عيب.

وبمناسبة "الأدب".. موقع "الوطن" نشر إمبارح بالليل فيديو لسيدة في عربة السيدات بالمترو طلبت بس إنها تمنع راجل من دخول العربة "حقها".. والراجل في الـ40 ومعاه زوجته وابنه.. المهم إن السيدة مسكت باب المترو.. وحلفت ما هو طالع.. وجه أمين شرطة واتكلم معاها.. وهب "رزعها" بالقلم.. ودي اسمها "قلة الأدب"..

تصرف السيدة في منع الرجل "سليم"..

طريقة اعتراضها ومنع الحركة "تتوصف جريمة"..

واللي عمله الأمين "جريمة وموثقة" للي عاوز يشوف .

وبعيد عن "وصلة الأدب وقلته".. ظني إن الرئيس عبدالفتاح السيسي "ندم" على مداخلته مع عمرو أديب وكلامه عن الأولتراس..

أولا الشباب ردوا بـ"ذكاء" وقالوا: "مش شغلنا نحقق.. حققوا وقدموا المتهمين".. والأهم والأسخن واللي متعملش حسابه.. إن الطرف التاني في القصة "بورسعيد" واللي فيها.. "أولتراس المصري" اللي طلعوا بيان شديد.. وتجاوزوا وقالوا: "وإحنا بكرة نازلين الشارع" والرئيس "انحاز وظلمنا".

وبمناسبة " ظلمنا ".. متنساش إن اليوم 3 فبراير.. الذكرى العاشرة لغرق 1034 مصريا في مياه البحر الأحمر.. أيوه حادث العبارة "السلام 98".. أيوه اللي جثث بعضهم متلقتش.. أيوه اللي قوات الإنقاذ والطيران راح لهم بعد الغرق بـ11 ساعة.. أيوه اللي ممتش منهم من الغرق مات متجمد.. أيوه اللي البرلمان وقتها منع صاحب العبارة ممدوح إسماعيل من السفر بعد ما هرب لـ"لندن".. أيوه اللي القضية بقت جنحة.. بس كده .

وللي بيسأل عن "حظر التجول" اللي حصل في حدائق المعادي.. خلية إرهابية كانت في شقة سكنية بشارع ضيق.. وكان المتهمين 2.. ومعاهم قنابل وأسلحة وذخيرة.. والتعامل معاهم بدأ واحدة بالليل وانتهى 9 الصبح.. واللي خلص القصة ضباط مكافحة الإرهاب الدولي.. لأن اللي حصل في تفجير شقة الهرم كان في ذاكرة الضباط والقيادات وعليه كان فيه حرص في التعامل.. والسكان بطبيعة الحال اتمنعوا من الدخول والخروج.

وللي بيسأل عن الكرة.. الزمالك هيقابل الإسماعيلي الساعة 5، والأهلي هيقابل إنبي الساعة 8 ورمضان صبحي فسخ خطوبته أو هكذا قالت المواقع.. بس كده.

وعشان كله ميبقاش.. ضرب.. ضرب.. ضرب:

"صغيرتي أنا لم أقل شيئا.. لم أقل وأبدا أبدا لن أقول ..

فحرصي عليك كحرص نفسي على الحياة لكي تطول لا تحزري نظراتهم إليك..

لا تفزعك همساتهم عليك فأنت في أعماق ذاتي..

سر أسرار حياتي فدعيهم يا حياتي..

يا حياتي دعيهم يفكرون..

يتسألون..

يتخيلون ولا تخافي واهدئي ..

واهدئي ..

يا صغيرتي ..

لا تبالي أنني .. أنني يا حبيبتي أخفي هواك عن العيون ..

فكيف مني يعرفون حبيبتي حبيبتي أنا من تكون حبيبتي..

من تكون حبيبتي أنا