شقيق أحد ضحايا زينة البحرين: مخدناش مبالغ مالية عن أخونا.. ولا كنوز الدنيا تعوضه

01:26 م | الثلاثاء 09 فبراير 2016

قال عمرو أبوحجازي، شقيق صلاح أبوحجازي، أحد ضحايا مركب "زينة البحرين" المفقودة في السودان، إنه مستاء لما تردد من شائعات، بشأن حصول أهالي الضحايا على مبالغ مالية كتعويضات من الدولة.

وقال عمرو: "مأخدناش حاجة ولا عايزين حاجة، إخواتنا مكانوش مسافرين عشان أكل عيشهم، عشان في الآخر تطلع شائعات تردد كلام كدب، وكأننا لما خرجنا في مظاهرات عشانهم كان عشان الفلوس".

ووجه شقيق الضحية، رسالة للمسؤولين، قائلا: "شقيقى توفى قبل ساعتين من العثور عليه من الجوع والعطش، وذلك بعد 10 أيام من غرق المركب، ولو أي مسؤول كان بحث بضمير، كانوا أنقذوا اخويا، لكن قدره انه مات جعان وعطشان بسبب إهمال المسؤولين".

وأوضح عمرو، لـ"الوطن"، أن له شقيقا آخر أصغر من صلاح، توفي قبل 6 أعوام غرقا، على متن مركب وردشان بعزبة البرج، مضيفا: "أخويا من الشعب الغلبان محدش سأل فيه، عايز حق أخويا الكبير الغلبان اللي مات جعان وعطشان عشان المسؤولين يرتاحوا".

وأكد شقيق الضحية: "ما تردد عن تسلم أسر صيادين المركب مبالغ مالية من الدولة غير صحيح، إحنا لما خرجنا نطالب طالبنا بحقه، مكناش عايزين غير نشوفه عايش، لا عايزين فلوس من الدولة ولا غيره، ولا ملايين الدنيا كلها تعوضنا عنه، كان الأب والأخ والصاحب والسند، واللي بيروح مبيرجعش، ولا كنوز الدنيا تعوضه".

وقالت ميادة أبوحجازي شقيقته: "حسبي الله ونعم الوكيل في كل مسؤول لم يقدم المساعدة لشقيقي كي يعود لنا حي"، وتابعت بملامح يبدو عليها الأسى: "لحد إمتى هيفضل الإهمال ده، واخواتي يخرجوا أحياء يرجعوا لنا أموات، إما في صندوق خشب أو كيس".

وكانت شائعات، ترددت عن حصول ضحايا مركب "زينة البحرين"، على أموال من الدولة، وهو ما نفته الأسر جملة وتفصيلا.