كون زي رغيف العيش..
بيخش النار..
ويموت علشان الخلق تعيش..
ما تكونش فلوس..
من كترها يصرف فيها الناس..
خليك أجرة عامل في الفاعل..
خليك بقشيش..
ما تكونش الهيبة بتحبس ضحك عيال في البيت..
خليك نكتة..
أو وردة تفرح بنت قصادك لو حبيت..
ما تكونش العمر بطوله..
خليك 12ساعة اجازة جيش..
ما تكونش النهر الجاري..
خليك آخر ندعة تبل في ريق الناس لو جف..
ما تكونش الحمل بحاله..
خليك آخر حاجة تتم ميزان الناس لو خف..
وان ما قدرتش تبقى..
خليك إنسان أو موت بشويش