اعرف كنوز مصر قبل ما تلف العالم
في بيت من بيوت القاهرة كان في ولد صغير كتب حلمه في ورقة، وقال إن حلم حياتي ألف العالم كله وأزور الـ7 قارات.
من 8 سنين تقريبًا، وقت ما كنت متطوع في جمعية بتساعد الأجانب يتعلموا عربي مقابل إنهم يتطوعوا يدرِّسوا لغتهم للمصريين، المهم كان في مجموعة منهم في القاهرة وبنت من المجموعة سألتني: إيه الأماكن اللي ممكن أزورها في مصر؟، قولتلها "يااه ده إحنا عندنا فى مصر أماكن كتير، الأهرامات وأبو الهول والأقصر وأسو...
وقبل ما أكمل كلمتي وقفتني، وقالتلي مصر مش الهرم والنيل؛ أنا عايزة أكتشف مصر الحقيقية، عايزة أشوف كنوز مصر، وللأسف معرفتش أرد عليها لأني مكنتش أعرف بلدي كويس، معرفش فعلاً إيه هي كنوز مصر، وفي نفس اليوم قررت إني أغير وجهة حلمي من العالم لمصر، وبدأت فعلًا أكتشف كنوز مصر واكتشف قد إيه فعلًا بلدنا حلوة جدًا.
لحد دلوقتي من 27 محافظة أنا زرت 25 محافظة؛ كل 3 شهور في مكان جديد نكتشفه سواء شمال ومدن القنال وإسكندرية، ولحد لما نوصل للسلوم، أو ننزل الجنوب لحد ما نوصل للنوبة وحدود السودان، ده غير سيناء اللي حقيقي جنة ربنا على الأرض.
بس حقيقي أكتر مكان قريب لقلبي هو دهب اللي عشت فيها جزء من حياتي، ومكان زرته أكثر من 30 مرة في حياتي ولسّه هزورها كمان أكثر، أما الصحراء الغربية فعلاً كنز من كنوزها ممكن تتخيل معايا رحلة لمدة أيام مشي بالجمال بتخرج من الواحات البحرية تقطع الصحراء الغربية كلها لحد لما توصل واحة سيوة في حوالي 28 يوم مشي وفكرة التخييم تحت نور النجوم وكل يوم تخييم في مكان، تخيّل معايا لما تقفل عينيك وتختم يومك بمنظر النجوم مزينة السماء مش سقف غرفة نومك اللي زهقت من شكله.
فكرة معرفة في كام مدينة في مصر والمدن دي فيها إيه لازم تكتشفه وتزوره، في أماكن شوفتها في مصر أعتقد لا يوجد لها مثيل فى العالم كله في أماكن فى مصر حقيقي المصريين ما يعرفوش عنها حاجة مثلًا في مكان فى مرسى علم اسمه وادي الجمال ودي محمية طبيعية على البحر الأحمر تخيّل أنك ممكن حرفيًا تكون بتعوم في البحر وتلاقي أكثر من 40 أو 50 دولفين بيعوموا حواليك، أعتقد مجرد قرآتك للجملة بس منحك شعور بالسعادة ماذا عن التجربة؟؟!!.
حقيقي السفر غير جوايا حاجات كتير أوي علمني ثقة واعتماد على النفس رهيبة، جربت حاجات أول مرة في حياتي أعملها زي إني أنام في محطة قطار، زي إني أبيّت في بيت عمدة في قرية من قرى الصعيد، ده غير أجدع حارس مدرسة اللي عزمني في الشتاء على كوباية شاي، ونومة جنب النار في بني سويف، قصص لو اتحكتلي مكنتش هصدقها.
بحاول أعتبر نفسي واحد من الرحالة في مصر، اتعلمت إزاي أسافر بأقل ميزانية ممكنة، اتعلمت وأخدت خبرة لو عشت سنين مش هعرف أكتسبها.
جدي عليه رحمة الله، علمني حاجة بفتكرها على طول إننا هنعيش حياة واحدة حاول تملاها بالتجارب، ولو مش هتعيش التجربة اسمعها من حد، علشان كده تقريبًا عندي من كل محافظة فى مصر حكاية. أهل مصر فعلاً كنز من كنوزها، حاجة كده بطعم الحياة.
أعتقد دلوقتي ممكن أكون جاهز فى الرد علي سؤال إيه الأماكن اللي ممكن أزورها في مصر أي هي كنوز مصر الحقيقية، فعلًا لازم ناخد قرار نكتشف بلدنا وكنوزها من دلوقتي وتكتشف تأثير السفر عليك، السفر هيغير حاجات كتير جواك وادعولي ألف العالم كله.
